ಮಂಗಳೂರು ರೈಲು ನಿಲ್ದಾಣದ ನಿಯಂತ್ರಣ ಬದಲಾವಣೆಯಿಂದಾಗಿ ಆರು ಎಕ್ಸ್‌ಪ್ರೆಸ್ ರೈಲುಗಳು ಮೈಸೂರು ವಿಭಾಗಕ್ಕೆ ವರ್ಗಾವಣೆ; ವಂದೇ ಭಾರತ್ ರೈಲುಗಳೂ ಪಾಲಕ್ಕಾಡ್ ವ್ಯಾಪ್ತಿಯಿಂದ ಹೊರಕ್ಕೆ

ಕಾಸರಗೋಡು : ಮಂಗಳೂರು  ರೈಲು ನಿಲ್ದಾಣದ ಆಡಳಿತ ನಿಯಂತ್ರಣವನ್ನು ಪಾಲಕ್ಕಾಡ್ ರೈಲ್ವೆ ವಿಭಾಗದಿಂದ ಮೈಸೂರು ವಿಭಾಗಕ್ಕೆ ವರ್ಗಾಯಿಸಿರುವ ಹಿನ್ನೆಲೆಯಲ್ಲಿ ಪಾಲಕ್ಕಾಡ್ ವಿಭಾಗವು ಎಕ್ಸ್‌ಪ್ರೆಸ್ ರೈಲುಗಳ ನೇರ ನಿಯಂತ್ರಣವನ್ನು ಕಳೆದುಕೊಳ್ಳಲಿದೆ. ಈ ಅಧಿಕಾರ ಹಸ್ತಾಂತರದ ಭಾಗವಾಗಿ ರೈಲುಗಳ ಸಂಖ್ಯೆಗಳ ಸರಣಿಯನ್ನೂ ಬದಲಾಯಿಸಲಾಗುತ್ತಿದೆ. 2027ರ ಜನವರಿ 1ರಿಂದ ಪಾಲಕ್ಕಾಡ್ ವಿಭಾಗದ ವ್ಯಾಪ್ತಿಯಲ್ಲಿದ್ದ ಹಲವು ಎಕ್ಸ್‌ಪ್ರೆಸ್ ರೈಲುಗಳ ನಿಯಂತ್ರಣ ಮೈಸೂರು ವಿಭಾಗಕ್ಕೆ ಸೇರಲಿದೆ.

ಇದುವರೆಗೆ ಪಾಲಕ್ಕಾಡ್ ವಿಭಾಗಕ್ಕೆ ಸಂಬಂಧಿಸಿದ ಎಕ್ಸ್‌ಪ್ರೆಸ್ ರೈಲುಗಳು 166 ಸರಣಿಯ ಸಂಖ್ಯೆಗಳೊಂದಿಗೆ ಸಂಚರಿಸುತ್ತಿದ್ದವು. ಹೊಸ ವ್ಯವಸ್ಥೆಯ ಪ್ರಕಾರ ಅವುಗಳ ಸಂಖ್ಯೆಗಳು 162 ಸರಣಿಗೆ ಬದಲಾಗಲಿವೆ. ಪ್ರಯಾಣಿಕರಿಗೆ ಇದು ಕೇವಲ ರೈಲು ಸಂಖ್ಯೆಯ ಬದಲಾವಣೆಯಂತೆ ಕಂಡರೂ, ರೈಲುಗಳ ಆಡಳಿತಾತ್ಮಕ ನಿಯಂತ್ರಣ ಮತ್ತು ನಿರ್ವಹಣಾ ವ್ಯವಸ್ಥೆಯಲ್ಲಿ ಮಹತ್ವದ ಬದಲಾವಣೆಯಾಗಲಿದೆ.

ರೈಲುಗಳ ಸಂಖ್ಯೆ ಬದಲಾವಣೆಗೆ ಸಂಬಂಧಿಸಿದಂತೆ ರೈಲ್ವೆ ಇಲಾಖೆ ಆದೇಶ ಹೊರಡಿಸಿದೆ. ಇದರಿಂದ ಟಿಕೆಟ್ ಕಾಯ್ದಿರಿಸುವಿಕೆ, ರೈಲುಗಳ ಮಾಹಿತಿ ಹುಡುಕುವುದು ಹಾಗೂ ಪ್ರಯಾಣದ ಸೂಚನೆಗಳನ್ನು ಪಡೆಯುವಾಗ ಪ್ರಯಾಣಿಕರು ಹೊಸ ಸಂಖ್ಯೆಗಳನ್ನು ಗಮನಿಸಬೇಕಾಗುತ್ತದೆ. ಮುಖ್ಯವಾಗಿ ಈ ರೈಲುಗಳು ಪಾಲಕ್ಕಾಡ್ ವಿಭಾಗದ ಅಧಿಕಾರ ವ್ಯಾಪ್ತಿಯಿಂದ ಹೊರಹೋಗಲಿವೆ.

2027 ಜನವರಿ 1ರಿಂದ ಮಲಬಾರ್, ಮಾವೇಲಿ, ಏರನಾಡ್, ಪರಶುರಾಮ್, ಮಂಗಳೂರು - ರಾಮೇಶ್ವರಂ, ಮಂಗಳೂರು - ಕೋಝಿಕ್ಕೋಡ್ ಹಾಗೂ ಪಾಲಕ್ಕಾಡ್  - ಕಣ್ಣೂರು ರೈಲು ಸೇವೆಗಳ ನಿಯಂತ್ರಣ ಮೈಸೂರು ವಿಭಾಗಕ್ಕೆ ವರ್ಗಾವಣೆಯಾಗಲಿದೆ. ಪ್ರಸ್ತುತ 166 ಸರಣಿಯಲ್ಲಿರುವ ರೈಲು ಸಂಖ್ಯೆಗಳನ್ನು 162 ಸರಣಿಗೆ ಮರುನಿಗದಿಪಡಿಸಲಾಗುತ್ತದೆ. ಎರಡೂ ದಿಕ್ಕಿನ ಪ್ರಯಾಣಗಳನ್ನು ಸೇರಿಸಿದಾಗ ಒಟ್ಟು 12 ರೈಲು ಸೇವೆಗಳು ಈ ಸಂಖ್ಯೆ ಬದಲಾವಣೆಯ ವ್ಯಾಪ್ತಿಗೆ ಬರಲಿವೆ.

ಎಕ್ಸ್‌ಪ್ರೆಸ್ ರೈಲುಗಳ ಜೊತೆಗೆ ವಂದೇ ಭಾರತ್ ರೈಲುಗಳ ಸಂಖ್ಯೆಯಲ್ಲೂ ಬದಲಾವಣೆಯಾಗಲಿದೆ. ಮಂಗಳೂರು - ತಿರುವನಂತಪುರ ವಂದೇ ಭಾರತ್ ರೈಲಿನ ಸಂಖ್ಯೆ 20631/20632ರಿಂದ 26659/26660ಕ್ಕೆ ಬದಲಾಗಲಿದೆ. ಮಂಗಳೂರು - ಮಡಗಾಂವ್ ವಂದೇ ಭಾರತ್ ರೈಲಿನ ಸಂಖ್ಯೆ 20646/20645ರಿಂದ 26657/26658ಕ್ಕೆ ಬದಲಾಗಲಿದೆ.

ವಂದೇ ಭಾರತ್ ಸೇರಿದಂತೆ ಹಲವು ರೈಲುಗಳ ನಿಯಂತ್ರಣ ಮೈಸೂರು ವಿಭಾಗಕ್ಕೆ ವರ್ಗಾವಣೆಯಾಗುತ್ತಿರುವುದು ಪಾಲಕ್ಕಾಡ್ ವಿಭಾಗದ ಅಧಿಕಾರ ವ್ಯಾಪ್ತಿಯಲ್ಲಿ ಮಹತ್ವದ ಬದಲಾವಣೆಯಾಗಿದೆ. ಮಂಗಳೂರು ನಿಲ್ದಾಣದಲ್ಲಿರುವ ರೈಲು ನಿರ್ವಹಣಾ ಸೌಲಭ್ಯಗಳ ಮೇಲಿನ ನಿಯಂತ್ರಣವನ್ನೂ ಪಾಲಕ್ಕಾಡ್ ವಿಭಾಗ ಕಳೆದುಕೊಳ್ಳಲಿದೆ.