ರಷ್ಯಾ ಡ್ರೋನ್ ದಾಳಿಯಲ್ಲಿ ಮೃತಪಟ್ಟ ನಾವಿಕ ಕಾಸರಗೋಡು ವೆಲ್ಲರಿಕುಂಡುವಿನ ಅಖಿಲ್ ಗೆ ಅಂತಿಮ ನಮನ

 ಕಾಸರಗೋಡು : ಉಕ್ರೇನ್‌ನ ಒಡೆಸಾ ಕರಾವಳಿಯಲ್ಲಿ ಸರಕು ಸಾಗಣೆ ಹಡಗಿನ ಮೇಲೆ ನಡೆದ ರಷ್ಯಾ ಡ್ರೋನ್ ದಾಳಿಯಲ್ಲಿ ಮೃತಪಟ್ಟ ಕಾಸರಗೋಡಿನ ವೆಲ್ಲರಿಕುಂಡುವಿನ ಯುವ ನಾವಿಕ ಅಖಿಲ್ ಜೋಯಲ್(26) ಅವರ ಅಂತ್ಯಕ್ರಿಯೆ ಇಂದು ಸ್ವಗ್ರಾಮದಲ್ಲಿ ನೆರವೇರಿತು.

ಘಟನೆ ನಡೆದು ಒಂದು ತಿಂಗಳ ಬಳಿಕ ಮಧ್ಯಾಹ್ನದ ವೇಳೆಗೆ ಅಖಿಲ್ ಅವರ ಮೃತದೇಹವನ್ನು ವಿಮಾನದ ಮೂಲಕ ಬೆಂಗಳೂರಿಗೆ ತರಲಾಯಿತು. ಬಳಿಕ ರಸ್ತೆ ಮಾರ್ಗವಾಗಿ ವೆಲ್ಲರಿಕುಂಡುವಿನಲ್ಲಿರುವ ಅವರ ನಿವಾಸಕ್ಕೆ ಕೊಂಡೊಯ್ಯಲಾಯಿತು. ಕುಟುಂಬಸ್ಥರು, ಬಂಧುಗಳು ಹಾಗೂ ಸ್ಥಳೀಯರ ಸಮ್ಮುಖದಲ್ಲಿ ಅಂತ್ಯಕ್ರಿಯೆ ನಡೆಯಿತು. ಕಾಸರಗೋಡು ಸಂಸದ ರಾಜಮೋಹನ್ ಉಣ್ಣಿತಾನ್, ಜಿಲ್ಲಾ ಪಂಚಾಯತ್ ಅಧ್ಯಕ್ಷ ಸಾಬು ಅಬ್ರಹಾಂ  ಸೇರಿದಂತೆ ಹಲವರು ಅಂತಿಮ ನಮನ ಸಲ್ಲಿಸಿದರು.

ಜುಲೈ 19ರಂದು ಒಡೆಸಾ ಕರಾವಳಿಯಲ್ಲಿ ‘ಎಂವಿ ಗೋಲ್ಡನ್ ಲಿಯೋ’ ಸರಕು ಹಡಗಿನ ಮೇಲೆ ರಷ್ಯಾ ಡ್ರೋನ್ ದಾಳಿ ನಡೆಸಿತ್ತು. ಆಹಾರ ಧಾನ್ಯಗಳನ್ನು ಸಾಗಿಸುತ್ತಿದ್ದ ಹಡಗಿನಲ್ಲಿ ಭಾರತೀಯರು ಹಾಗೂ ಸಿರಿಯನ್ ಪ್ರಜೆಗಳು ಸೇರಿದಂತೆ 17 ಸಿಬ್ಬಂದಿ ಇದ್ದರು. ದಾಳಿಯಲ್ಲಿ ನಾಲ್ವರು ಭಾರತೀಯರು ಹಾಗೂ ಒಬ್ಬ ಉಕ್ರೇನಿಯನ್ ನಾವಿಕ ಸೇರಿದಂತೆ ಒಟ್ಟು 10 ಮಂದಿ ಮೃತಪಟ್ಟಿದ್ದರು.

ವೆಲ್ಲರಿಕುಂಡುವಿನ ನಿವಾಸಿ ಜೋಯನ್ ಮತ್ತು ಪರಪ್ಪ ಅಂಚೆ ಕಚೇರಿಯ ಆರ್‌ಡಿ ಏಜೆಂಟ್ ಸಾಲಿ ದಂಪತಿಯ ಏಕೈಕ ಪುತ್ರನಾಗಿದ್ದ ಅಖಿಲ್, ಕುಟುಂಬದ ಆರ್ಥಿಕ ಸ್ಥಿತಿ ಸುಧಾರಿಸಲು ನಾಲ್ಕು ವರ್ಷಗಳ ಹಿಂದೆ ವ್ಯಾಪಾರಿ ನೌಕಾಪಡೆ ಸೇರಿದ್ದರು. ಒಂದು ವರ್ಷದ ಹಿಂದೆ ಸ್ವಂತ ಮನೆಯನ್ನು ನಿರ್ಮಿಸಿದ್ದ ಅವರು, ಎರಡು ತಿಂಗಳ ರಜೆಯ ಬಳಿಕ ಘಟನೆಗೆ ಕೇವಲ 40 ದಿನಗಳ ಮುನ್ನ ಕರ್ತವ್ಯಕ್ಕೆ ಮರಳಿದ್ದರು.

ಮನೆಗೆ ಬಂದಿದ್ದ ವೇಳೆ ಇಡುಕ್ಕಿಯ ಯುವತಿಯೊಂದಿಗೆ ಅಖಿಲ್ ಅವರ ವಿವಾಹ ನಿಶ್ಚಯವಾಗಿತ್ತು. ಮುಂದಿನ ವರ್ಷದ ಏಪ್ರಿಲ್‌ನಲ್ಲಿ ಮದುವೆ ನಡೆಸಲು ಕುಟುಂಬಗಳು ನಿರ್ಧರಿಸಿದ್ದವು. ಆದರೆ, ಮದುವೆಯ ಕನಸು ನನಸಾಗುವ ಮುನ್ನವೇ ಅಖಿಲ್ ದುರಂತಕ್ಕೆ ಬಲಿಯಾಗಿದ್ದಾರೆ.

ವೆಲ್ಲರಿಕುಂಡುವಿನ ಸೇಂಟ್ ಜೂಡ್ಸ್ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ಪ್ಲಸ್ ಟು ಪೂರ್ಣಗೊಳಿಸಿದ ಬಳಿಕ ಚೆನ್ನೈನಲ್ಲಿ ಮೆರೈನ್ ಎಂಜಿನಿಯರಿಂಗ್‌ನಲ್ಲಿ ಉನ್ನತ ಶಿಕ್ಷಣ ಪಡೆದಿದ್ದರು. ಕ್ರೀಡಾ ಕ್ಷೇತ್ರದಲ್ಲೂ ಗುರುತಿಸಿಕೊಂಡಿದ್ದ ಅಖಿಲ್, 2014–15ರ ರಾಷ್ಟ್ರೀಯ ಟಗ್ ಆಫ್ ವಾರ್ ಚಾಂಪಿಯನ್‌ಶಿಪ್ ಗೆದ್ದ ಕೇರಳ ತಂಡವನ್ನು ಪ್ರತಿನಿಧಿಸಿದ್ದರು. ರಾಜ್ಯ ಮಟ್ಟದ ಚಾಂಪಿಯನ್‌ಶಿಪ್‌ಗಳಲ್ಲೂ ಭಾಗವಹಿಸಿದ್ದರು. 30 ಸೆಕೆಂಡುಗಳಲ್ಲಿ 25 ಹಗ್ಗ ಪುಲ್-ಅಪ್‌ಗಳನ್ನು ಮಾಡುವ ಮೂಲಕ ‘ವರ್ಲ್ಡ್‌ವೈಡ್ ಬುಕ್ ಆಫ್ ರೆಕಾರ್ಡ್ಸ್’ನಲ್ಲೂ ಸ್ಥಾನ ಪಡೆದಿದ್ದ ಅಖಿಲ್, ಕುಟುಂಬ ಹಾಗೂ ಸ್ನೇಹಿತರ ಪಾಲಿಗೆ ಮರೆಯಲಾಗದ ನೆನಪಾಗಿ ಉಳಿದಿದ್ದಾರೆ.