ಸಮಾನತೆಯ ಹರಿಕಾರ : ಸಂವಿಧಾನ ಶಿಲ್ಪಿ ಡಾ. ಬಿ.ಆರ್. ಅಂಬೇಡ್ಕರ್

 

ನೂರಾರು ವರ್ಷಗಳ ಗುಲಾಮಗಿರಿಯ ಸಂಕೋಲೆಯನ್ನು ಕಳಚಲು ಕೇವಲ ಸ್ವಾತಂತ್ರ್ಯವಿದ್ದರೆ ಸಾಲದು, ಅಲ್ಲಿ ಸಾಮಾಜಿಕ ಸಮಾನತೆ ಮತ್ತು ಜ್ಞಾನದ ಅಡಿಪಾಯವಿರಬೇಕು ಎಂದು ಸಾರಿದ ಮಹಾನ್ ಚೇತನ ಡಾ. ಬಿ.ಆರ್. ಅಂಬೇಡ್ಕರ್. ಇವತ್ತು ನಾವು ಅನುಭವಿಸುತ್ತಿರುವ ಪ್ರಜಾಪ್ರಭುತ್ವದ ಘನತೆ ಮತ್ತು ಹಕ್ಕುಗಳ ಹಿಂದೆ ಒಬ್ಬ ವ್ಯಕ್ತಿಯ ಅಸಾಧಾರಣ ಹೋರಾಟ ಹಾಗೂ ಅಪಾರವಾದ ಪಾಂಡಿತ್ಯವಿದೆ. ಪ್ರತಿ ವರ್ಷ ಏಪ್ರಿಲ್ 14 ಬಂತೆಂದರೆ ಭಾರತದಾದ್ಯಂತ ಹೊಸ ಸಂಚಲನ. ಪ್ರತಿ ಏಪ್ರಿಲ್ 14 ಕೇವಲ ಒಂದು ದಿನಾಂಕವಲ್ಲ, ಅದು ಶೋಷಿತ ವರ್ಗದ ಆತ್ಮಗೌರವದ ಹಬ್ಬ ಮತ್ತು ಭಾರತದ ಭವಿಷ್ಯವನ್ನು ಬರೆದ 'ವಿಶ್ವಜ್ಞಾನಿ'ಯ ಜನ್ಮದಿನ. ಅದು ಕೇವಲ ಒಬ್ಬ ವ್ಯಕ್ತಿಯ ಜನ್ಮದಿನವಲ್ಲ; ಶೋಷಿತರ ಧ್ವನಿ, ಭಾರತ ಸಂವಿಧಾನದ ಶಿಲ್ಪಿ, ಜ್ಞಾನದ ಸಂಕೇತ ಡಾ. ಭೀಮರಾವ್ ರಾಮ್‌ಜೀ ಅಂಬೇಡ್ಕರ್ ಅವರ ಜಯಂತಿ. ಇಂದು ನಾವು ಆಚರಿಸುತ್ತಿರುವ ಅಂಬೇಡ್ಕರ್ ಜಯಂತಿಯು ಕೇವಲ ಆಚರಣೆಯಾಗದೆ, ಅವರ ವಿಚಾರಧಾರೆಗಳ ಆತ್ಮಾವಲೋಕನವಾಗಬೇಕಿದೆ.

ಬಾಲ್ಯ ಮತ್ತು ಸಂಘರ್ಷದ ಹಾದಿ

1891ರಲ್ಲಿ ಮಧ್ಯಪ್ರದೇಶದ ಮ್ಹೌ  ಎಂಬಲ್ಲಿ ಜನಿಸಿದ ಭೀಮರಾವ್, ಬಾಲ್ಯದಿಂದಲೇ ಅಸ್ಪೃಶ್ಯತೆಯ ಕಹಿ ಅನುಭವಗಳನ್ನು ಉಂಡವರು. ಶಾಲೆಯಲ್ಲಿ ಕುಡಿಯುವ ನೀರಿಗೂ ಪರದಾಡುತ್ತಿದ್ದ ಆ ಹುಡುಗ, ಮುಂದೆ ಜಗತ್ತಿನ ಶ್ರೇಷ್ಠ ವಿಶ್ವವಿದ್ಯಾಲಯಗಳಿಂದ ಪದವಿ ಪಡೆದದ್ದು ಒಂದು ಅದ್ಭುತ ಚರಿತ್ರೆ. ಸೋಲನ್ನೇ ಮೆಟ್ಟಿಲನ್ನಾಗಿ ಮಾಡಿಕೊಂಡ ಅವರು, "ಶಿಕ್ಷಣ, ಸಂಘಟನೆ ಮತ್ತು ಹೋರಾಟ" ಎಂಬ ಮಂತ್ರವನ್ನು ಸಮಾಜಕ್ಕೆ ನೀಡಿದರು.

ಸಂವಿಧಾನದ ಶಿಲ್ಪಿ ಮತ್ತು ರಾಷ್ಟ್ರ ನಿರ್ಮಾಣ

ಭಾರತಕ್ಕೆ ಸ್ವಾತಂತ್ರ್ಯ ಸಿಕ್ಕಾಗ ಸವಾಲಾಗಿದ್ದದ್ದು ವೈವಿಧ್ಯಮಯ ದೇಶವನ್ನು ಒಂದುಗೂಡಿಸುವ ಕಾನೂನಿನ ಚೌಕಟ್ಟು. ಸಂವಿಧಾನ ಕರಡು ಸಮಿತಿಯ ಅಧ್ಯಕ್ಷರಾಗಿ ಅಂಬೇಡ್ಕರ್ ಅವರು ನೀಡಿದ ಕೊಡುಗೆ ಅನನ್ಯ.

ಲಿಂಗ ಸಮಾನತೆ : ಹಿಂದೂ ಕೋಡ್ ಬಿಲ್ ಮೂಲಕ ಮಹಿಳೆಯರಿಗೆ ಆಸ್ತಿ ಮತ್ತು ಸಮಾನ ಹಕ್ಕಿಗಾಗಿ ಹೋರಾಡಿದರು.

ಕಾರ್ಮಿಕ ಸುಧಾರಣೆ : ದಿನದ ಕೆಲಸದ ಅವಧಿಯನ್ನು 12 ಗಂಟೆಯಿಂದ 8 ಗಂಟೆಗೆ ಇಳಿಸಿದ ಕೀರ್ತಿ ಅವರಿಗೆ ಸಲ್ಲುತ್ತದೆ.

ಆರ್ಥಿಕ ಚಿಂತನೆ : ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಸ್ಥಾಪನೆಯ ಹಿಂದೆ ಅವರ 'The Problem of the Rupee' ಪ್ರಬಂಧದ ಆಲೋಚನೆಗಳಿವೆ.

ಜ್ಞಾನವೇ ಅವರ ಆಯುಧ

ಅಂಬೇಡ್ಕರ್ ಅವರು ಕೇವಲ ದಲಿತರ ನಾಯಕರಾಗಿರಲಿಲ್ಲ, ಬದಲಿಗೆ ಅವರು ಒಬ್ಬ ಶ್ರೇಷ್ಠ ಅರ್ಥಶಾಸ್ತ್ರಜ್ಞ, ಸಮಾಜಶಾಸ್ತ್ರಜ್ಞ ಮತ್ತು ರಾಜತಾಂತ್ರಿಕ ತಜ್ಞರಾಗಿದ್ದರು. "ಬೋಧಿಸತ್ವ" ಎಂಬ ಬಿರುದಿಗೆ ಪಾತ್ರರಾದ ಇವರು, ಕೊನೆಯ ದಿನಗಳಲ್ಲಿ ಬುದ್ಧನ ಶಾಂತಿ ಮತ್ತು ಅಹಿಂಸೆಯ ಹಾದಿಯನ್ನು ಹಿಡಿದರು.  ಈ ಮಹಾನ್ ಚೇತನ  1956ರ ಡಿಸೆಂಬರ್ 6ರಂದು ಪರಿನಿರ್ವಾಣವನ್ನು ಹೊಂದಿದರು. ಅವರ ಜೀವನ ಮತ್ತು ಸಾಧನೆಗಳು ನಮ್ಮೆಲ್ಲರಿಗೂ ಪ್ರೇರಣೆಯಾಗಿವೆ. ಅವರು ಸಮಾನತೆ ಮತ್ತು ನ್ಯಾಯಕ್ಕಾಗಿ ಹೋರಾಡಿದ ಮಹಾನ್ ನಾಯಕರು. ಡಾ. ಅಂಬೇಡ್ಕರ್ ಅವರು ಭಾರತದಲ್ಲಿ ಸಾಮಾಜಿಕ ನ್ಯಾಯದ ಸಂಕೇತವಾಗಿದ್ದು, ಅವರ ಚಿಂತನೆಗಳು ಇಂದಿಗೂ ಪ್ರಸ್ತುತವಾಗಿವೆ. ಜಾತಿ ಪದ್ಧತಿ, ಅಸಮಾನತೆ ಮತ್ತು ದ್ವೇಷದ ರಾಜಕಾರಣದ ನಡುವೆ ಅಂಬೇಡ್ಕರ್ ಅವರ ವಿಚಾರಗಳು ದಾರಿದೀಪವಾಗಿವೆ. 

ಬಾಬಾಸಾಹೇಬ್ ಅಂಬೇಡ್ಕರ್ ಅವರು ಒಂದು ಜಾತಿಗೆ ಅಥವಾ ಒಂದು ವರ್ಗಕ್ಕೆ ಸೀಮಿತವಾದ ನಾಯಕರಲ್ಲ. ಅವರು ಇಡೀ ಮಾನವಕುಲದ ಸಮಾನತೆಯ ರಾಯಭಾರಿ. ಅವರ ಜಯಂತಿಯನ್ನು ಕೇವಲ ಮೆರವಣಿಗೆ ಮತ್ತು ಭಾಷಣಗಳಿಗೆ ಸೀಮಿತಗೊಳಿಸದೆ, ಅವರು ತೋರಿದ 'ಶಿಕ್ಷಣ, ಸಂಘಟನೆ ಮತ್ತು ಹೋರಾಟ'ದ ಹಾದಿಯಲ್ಲಿ ನಡೆಯುವುದು ಇಂದಿನ ಅಗತ್ಯವಾಗಿದೆ. ಸಂವಿಧಾನದ ಮೌಲ್ಯಗಳನ್ನು ಎತ್ತಿಹಿಡಿಯುವ ಮೂಲಕ ಸಬಲ, ಸಮೃದ್ಧ ಭಾರತವನ್ನು ನಿರ್ಮಿಸುವುದೇ ನಾವು ಅವರಿಗೆ ಸಲ್ಲಿಸುವ ನಿಜವಾದ ಗೌರವ. ಅವರ ವಿಚಾರಗಳು ಮನುಕುಲ ಇರುವವರೆಗೂ ಅಜರಾಮರ.

ಸಂಗ್ರಹ ಲೇಖನ