ಗೆಲುವು ನಿರೀಕ್ಷಿತ ಮಂಜೇಶ್ವರ, ನೇಮಂ ಮತ್ತು ಕಜಕೂಟಂನಲ್ಲಿ ಅಲ್ಪ ಸಂಖ್ಯಾತರ ಮತಗಳ ಧ್ರುವೀಕರಣ : ಬಿಜೆಪಿ

 

ಕೊಚ್ಚಿ : ಭಾಜಪ ಪಕ್ಷದ ಕೋರ್ ಕಮಿಟಿಯ ಆರಂಭಿಕ ಅಂದಾಜಿನ ಪ್ರಕಾರ,  ಬಿಜೆಪಿ ಈ ಬಾರಿ ಕೇರಳ ವಿಧಾನಸಭೆಯಲ್ಲಿ ತನ್ನ ಖಾತೆ ತೆರೆಯಲು ಸಾಧ್ಯವಾಗುವುದಿಲ್ಲ. ಚುನಾವಣೆಗೆ ಮುನ್ನ ಗೆಲ್ಲುವ ಸಾಧ್ಯತೆ ಇದೆ ಎಂದು ಪರಿಗಣಿಸಲಾಗಿದ್ದ ಮಂಜೇಶ್ವರ, ನೇಮಂ ಮತ್ತು ಕಜಕೂಟಂ ಕ್ಷೇತ್ರಗಳಲ್ಲಿಯೂ ಗೆಲುವು ಖಾತರಿಪಡಿಸಲು ಸಾಧ್ಯವಿಲ್ಲ ಎಂಬುದು ಇದೀಗ  ಪಕ್ಷದ ಅಂತರಿಕ ಲೆಕ್ಕಚಾರವಾಗಿದೆ. 11 ಹೆಚ್ಚುವರಿ ಸ್ಥಾನಗಳಲ್ಲಿ ಅವಕಾಶವಿದೆ ಎಂದು ನಾಯಕರು ಹೇಳಿಕೊಂಡರೂ, ಪಕ್ಷದ ಆಂತರಿಕ ಚರ್ಚೆಗಳಲ್ಲಿ ಗಂಭೀರ ಕಳವಳ ವ್ಯಕ್ತವಾಗಿದೆ. ಬಿಜೆಪಿಯ ಭರವಸೆಗೆ ಪ್ರಮುಖ ಹಿನ್ನಡೆ ಮತ ಬ್ಯಾಂಕ್‌ಗಳಲ್ಲಿನ ಬದಲಾವಣೆಯಾಗಿದೆ. ಮುಸ್ಲಿಂ ಮತಗಳು ಹೆಚ್ಚಾಗಿ ಯುಡಿಎಫ್ ಪರವಾಗಿ ಕ್ರೋಢೀಕರಿಸಲ್ಪಟ್ಟವು ಮತ್ತು ಕ್ರಿಶ್ಚಿಯನ್ ಮತಗಳು ನಿರೀಕ್ಷೆಯಂತೆ ಕ್ರೋಢೀಕರಿಸಲ್ಪಟ್ಟಿಲ್ಲ ಎಂದು ಅಂದಾಜಿಸಲಾಗಿದೆ.  ಅಲ್ಪಸಂಖ್ಯಾತ ಮತಗಳ ಈ ಧ್ರುವೀಕರಣವು ಬಿಜೆಪಿಗೆ ಪ್ರಮುಖ ಸವಾಲನ್ನು ಸೃಷ್ಟಿಸಿತ್ತು.

ಕ್ಷೇತ್ರದಲ್ಲಿನ ವಿವಾದಗಳು ರಾಜ್ಯಾದ್ಯಂತ ಬಿಜೆಪಿಯ ಮೇಲೆ ಪ್ರತಿಕೂಲ ಪರಿಣಾಮ ಬೀರಿವೆ ಎಂದು ಕೋರ್ ಕಮಿಟಿ ಗಮನಿಸಿದೆ. ಬಿಜೆಪಿ ಅಭ್ಯರ್ಥಿ ಶೋಭಾ ಸುರೇಂದ್ರನ್ ಮತಗಳಿಗೆ ಹಣ ನೀಡುತ್ತಿರುವ ದೃಶ್ಯಗಳು ಮತ್ತು ಬಿಜೆಪಿ ಕೇಂದ್ರದಲ್ಲಿ ಯುಡಿಎಫ್ ಅಭ್ಯರ್ಥಿ ರಮೇಶ್ ಪಿಶಾರಡಿಯನ್ನು ದಿಗ್ಬಂಧನಗೊಳಿಸಿದ ಪ್ರಕರಣ ಮತದಾರರಲ್ಲಿ ಭಾರೀ  ಪ್ರತಿಭಟನೆಗೆ ಕಾರಣವಾಯಿತು. ಇಂತಹ ಘಟನೆಗಳು ಪಕ್ಷದ ವರ್ಚಸ್ಸಿನ ಮೇಲೆ ಗಂಭೀರ ಪರಿಣಾಮ ಬೀರಿವೆ ಎಂದು ತಿಳಿಯಲಾಗಿದೆ. ಅಭ್ಯರ್ಥಿಗಳ ಆಯ್ಕೆ ಮತ್ತು ಪ್ರಚಾರದಲ್ಲಿ ಇದ್ದ ಭಿನ್ನಾಭಿಪ್ರಾಯಗಳು ಪಕ್ಷವನ್ನು ಕಾಡುತ್ತಿವೆ. ಪಾಲಕ್ಕಾಡ್‌ನಲ್ಲಿ ಬಿಜೆಪಿ ಅಭ್ಯರ್ಥಿ ಶೋಭಾ ಸುರೇಂದ್ರನ್ ವಿರುದ್ಧ ರಾಜ್ಯ ನಾಯಕತ್ವಕ್ಕೆ ಹಲವಾರು ದೂರುಗಳು ಬಂದಿವೆ. ಪ್ರಚಾರದ ಉಸ್ತುವಾರಿ ವಹಿಸಿರುವ ನಾಯಕರು ನಿರ್ಧರಿಸಿದ ಅನೇಕ ಕಾರ್ಯಕ್ರಮಗಳಿಗೆ ಅವರು ಸಹಕರಿಸಲಿಲ್ಲ ಎಂಬುದು ಮುಖ್ಯ ಆರೋಪ. ಚುನಾವಣೆಗಳ ಪರಿಶೀಲನೆಗಾಗಿ ನೇಮಿಸಲಾದ ಮೂವರು ಸದಸ್ಯರ ಸಮಿತಿಯು ಈ ತಿಂಗಳ 31 ರೊಳಗೆ ಜಿಲ್ಲೆಗಳಲ್ಲಿ ತನ್ನ ಸಭೆಗಳನ್ನು ಪೂರ್ಣಗೊಳಿಸಿ ರಾಜ್ಯ ನಾಯಕತ್ವಕ್ಕೆ ಅಂತಿಮ ವರದಿಯನ್ನು ಸಲ್ಲಿಸಲಿದೆ.