ಬ್ಯಾಂಕ್ ಉದ್ಯೋಗಿ ಮಹಿಳೆ ಮನೆಯಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆ

ಕಾಸರಗೋಡು : ಬ್ಯಾಂಕ್ ಉದ್ಯೋಗಿಯಾಗಿದ್ದ ವಿವಾಹಿತ ಮಹಿಳೆಯೊಬ್ಬರು ಮನೆಯಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿ ಬಳಿಕ ಮೃತಪಟ್ಟ ಘಟನೆ ಬೇಕಲ ಪೊಲೀಸ್ ಠಾಣಾ ವ್ಯಾಪ್ತಿಯ ಕುನ್ನಿಲ್ ಹದ್ದಾದ್ ನಗರದಲ್ಲಿ ನಡೆದಿದೆ.

ದೊಡ್ಡವಳಪ್ಪಿಲ್ ಮನೆಯ ಪ್ರಿಯಾ (40) ಮೃತಪಟ್ಟವರು. ಇಂದು ಬೆಳಗ್ಗೆ ಮನೆಯ ಮಲಗುವ ಕೋಣೆಯಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪ್ರಿಯಾ ಪತ್ತೆಯಾಗಿದ್ದರು. ಕೂಡಲೇ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ. ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ಕಾಸರಗೋಡು ಜನರಲ್ ಆಸ್ಪತ್ರೆಯ ಶವಾಗಾರಕ್ಕೆ ಸ್ಥಳಾಂತರಿಸಲಾಗಿದೆ. ಪ್ರಿಯಾ ಕುಂಬಳೆ ಸೌತ್ ಇಂಡಿಯನ್ ಬ್ಯಾಂಕ್ ಆರಿಕ್ಕಾಡಿ ಶಾಖೆಯಲ್ಲಿ ಉದ್ಯೋಗಿಯಾಗಿದ್ದರು.

ಕಾಞಂಗಾಡ್ ಕೆಎಸ್‌ಇಬಿ ಸೂಪರಿಂಟೆಂಡೆಂಟ್ ದಿನೇಶ್ ಅವರ ಪತ್ನಿಯಾಗಿದ್ದ ಪ್ರಿಯಾ, ಪೆರುಂಬಳ ಕಪ್ಪಣಯಡ್ಕದ ಅನಂತನ್–ಉಷಾ ದಂಪತಿಯ ಪುತ್ರಿ. ಶ್ರೀಹರಿ ಹಾಗೂ ಶ್ರೀಪಾರ್ವತಿ ಅವರ ಮಕ್ಕಳು. ಇಬ್ಬರೂ ವಿದ್ಯಾರ್ಥಿಗಳಾಗಿದ್ದಾರೆ. ಹರೀಶ್ ಹಾಗೂ ಪ್ರೀತಿ ಸಹೋದರ-ಸಹೋದರಿಯರು.

ಒಂದು ಕ್ಷಣದ ಸಂಕಷ್ಟಕ್ಕೆ ಆತ್ಮಹತ್ಯೆ ಪರಿಹಾರವಲ್ಲ.

ಜೀವನದಲ್ಲಿ ಎಂತಹ ಕಷ್ಟ ಎದುರಾದರೂ ಅದನ್ನು ಒಬ್ಬರೇ ಎದುರಿಸಬೇಕಿಲ್ಲ. ನಿಮ್ಮ ಸಮಸ್ಯೆಯನ್ನು ವಿಶ್ವಾಸಾರ್ಹ ವ್ಯಕ್ತಿಯೊಂದಿಗೆ ಹಂಚಿಕೊಳ್ಳಿ. ಸಹಾಯ ಕೇಳುವುದು ದುರ್ಬಲತೆಯಲ್ಲ; ಅದು ಧೈರ್ಯ. ನಿಮ್ಮ ಜೀವನ ಅಮೂಲ್ಯ — ಸಮಸ್ಯೆಗಳಿಗೆ ಪರಿಹಾರವಿದೆ.

ಸಹಾಯವಾಣಿ:

📞 ಕೇರಳ – DISHA: 1056 (24x7, ಉಚಿತ)

📞 ರಾಷ್ಟ್ರೀಯ Tele-MANAS: 14416 (ಮಾನಸಿಕ ಆರೋಗ್ಯ ಸಹಾಯ)

ತಕ್ಷಣದ ಅಪಾಯವಿದ್ದರೆ ಸಮೀಪದ ಆಸ್ಪತ್ರೆಗೆ ತೆರಳಿ ಅಥವಾ 112ಕ್ಕೆ ಕರೆ ಮಾಡಿ.