ಕಾಸರಗೋಡು : ಕೇರಳ ಹಾಗೂ ತಮಿಳುನಾಡಿನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಕಾನ್ಫೆಡರೇಶನ್ ಆಫ್ ಆಲ್ ಕೇರಳ ಕ್ಯಾಟರರ್ಸ್ (CAKC) ಸಂಘಟನೆಯ ಕಾಸರಗೋಡು ಜಿಲ್ಲಾ ಸಮಿತಿ, ಇತ್ತೀಚೆಗೆ ಕೋಟಯಂನಲ್ಲಿ ಕ್ಯಾಟರಿಂಗ್ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ನಡೆದ ಘಟನೆಯ ಹಿನ್ನೆಲೆಯಲ್ಲಿ ಸ್ಪಷ್ಟನೆ ನೀಡಿದೆ.
ಕೋಟಯಂನಲ್ಲಿ ನಡೆದ ಘಟನೆಯಲ್ಲಿ ಸಂಬಂಧಪಟ್ಟ ಕ್ಯಾಟರಿಂಗ್ ಸಂಸ್ಥೆಗೂ ಸಿಎಕೆಸಿ ಸಂಘಟನೆಗೂ ಅಥವಾ ಅದರ ಸದಸ್ಯರಿಗೂ ಯಾವುದೇ ಸಂಬಂಧವಿಲ್ಲ ಎಂದು ಸಂಘಟನೆ ಸ್ಪಷ್ಟಪಡಿಸಿದೆ. ಆದರೆ ಈ ಘಟನೆಯ ಪರಿಣಾಮವಾಗಿ ರಾಜ್ಯಾದ್ಯಂತ ಪ್ರಾಮಾಣಿಕವಾಗಿ ಕ್ಯಾಟರಿಂಗ್ ಕ್ಷೇತ್ರದಲ್ಲಿ ಸೇವೆ ಸಲ್ಲಿಸುತ್ತಿರುವವರ ಮೇಲೂ ಸಾರ್ವಜನಿಕರಲ್ಲಿ ಅನುಮಾನ ಮೂಡುವ ಪರಿಸ್ಥಿತಿ ನಿರ್ಮಾಣವಾಗಿರುವುದು ವಿಷಾದನೀಯ ಎಂದು ಪದಾಧಿಕಾರಿಗಳು ತಿಳಿಸಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಕಟವಾಗುವ ಕ್ಯಾಟರಿಂಗ್ ಸೇವೆಗಳ ಕುರಿತ ಮಾಹಿತಿಯ ಸತ್ಯಾಸತ್ಯತೆಯನ್ನು ಪರಿಶೀಲಿಸುವ ಅಗತ್ಯವಿದೆ. ಪರಂಪರೆಯಿಂದಲೂ ಹಾಗೂ ಹೊಸದಾಗಿ ಈ ಕ್ಷೇತ್ರಕ್ಕೆ ಬಂದಿರುವವರಲ್ಲಿಯೂ ಗುಣಮಟ್ಟ, ಪ್ರಾಮಾಣಿಕತೆ ಮತ್ತು ಕೃತ್ಯನಿಷ್ಠೆಯಿಂದ ಗ್ರಾಹಕರ ಕಾರ್ಯಕ್ರಮಗಳನ್ನು ತಮ್ಮ ಕುಟುಂಬದ ಕಾರ್ಯಕ್ರಮಗಳಂತೆ ಆತ್ಮೀಯವಾಗಿ ನಡೆಸಿಕೊಡುವ ಅನೇಕ ಸಂಸ್ಥೆಗಳಿವೆ ಎಂದು ಸಿಎಕೆಸಿ ತಿಳಿಸಿದೆ.
ಕೆಲವರು ಒಂದೆರಡು ಕ್ಯಾಟರಿಂಗ್ ಕೆಲಸಗಳಲ್ಲಿ ಸಹಾಯಕರಾಗಿ ಕಾರ್ಯನಿರ್ವಹಿಸಿದ ಬಳಿಕ ಸ್ವತಂತ್ರವಾಗಿ ಸಂಸ್ಥೆ ಆರಂಭಿಸಿ, ಹಿಂದೆ ಕೆಲಸ ಮಾಡಿದ್ದ ಸಂಸ್ಥೆಯ ಹೆಸರು ಅಥವಾ ಪರಿಚಯದ ಆಧಾರದ ಮೇಲೆ ಕೆಲಸಗಳನ್ನು ಪಡೆಯುವ ಪರಿಸ್ಥಿತಿಯೂ ಇದೆ. ಅಗತ್ಯವಿದ್ದಾಗ ಸಬ್ವರ್ಕ್ ಮಾಡುವವರನ್ನು ಲಭ್ಯವಾಗಿಸುವುದು ಸಾಧ್ಯವಾಗದ ಸಂದರ್ಭಗಳಲ್ಲಿ ಇಂತಹ ಸಮಸ್ಯೆಗಳು ಎದುರಾಗುವ ಸಾಧ್ಯತೆಯಿದೆ. ಇಂತಹ ಕಾರಣಗಳಿಂದಲೇ ಕೆಲವೊಮ್ಮೆ ವಿಷಾದನೀಯ ಘಟನೆಗಳು ಸಂಭವಿಸುತ್ತವೆ ಎಂದು ಸಂಘಟನೆ ಅಭಿಪ್ರಾಯಪಟ್ಟಿದೆ.
ಇಂತಹ ಕೆಲವರ ಬಳಿ ಎಫ್ಎಸ್ಎಸ್ಎಐ ಪ್ರಮಾಣಪತ್ರ ಅಥವಾ ಶಾಶ್ವತ ಅಡುಗೆಮನೆಯಂತಹ ಅಗತ್ಯ ವ್ಯವಸ್ಥೆಗಳು ಇಲ್ಲದಿರುವ ಸಾಧ್ಯತೆಯೂ ಇದೆ. ಆದ್ದರಿಂದ ಕ್ಯಾಟರಿಂಗ್ ಸೇವೆ ಪಡೆಯುವ ಮುನ್ನ ಸಂಸ್ಥೆಯ ದಾಖಲೆಗಳು, ಪ್ರಮಾಣಪತ್ರಗಳು ಮತ್ತು ಸೇವೆಯ ವಿಶ್ವಾಸಾರ್ಹತೆಯನ್ನು ಪರಿಶೀಲಿಸುವಂತೆ ಸಿಎಕೆಸಿ ಸಾರ್ವಜನಿಕರಲ್ಲಿ ಮನವಿ ಮಾಡಿದೆ.
ಸಿಎಕೆಸಿ ಸದಸ್ಯತ್ವ ಪಡೆದಿರುವ ಪ್ರತಿಯೊಬ್ಬ ಸದಸ್ಯರೂ ತಮ್ಮ ಕೆಲಸವನ್ನು ಪ್ರಾಮಾಣಿಕತೆ ಮತ್ತು ಆತ್ಮಾರ್ಥತೆಯಿಂದ ನಿರ್ವಹಿಸುತ್ತಾರೆ ಎಂಬ ಹೆಮ್ಮೆ ಸಂಘಟನೆಗಿದೆ. ಕೋಟಯಂನಲ್ಲಿ ನಡೆದಿರುವ ದುರದೃಷ್ಟಕರ ಘಟನೆಯನ್ನು ಸಿಎಕೆಸಿ ಕಾಸರಗೋಡು ಜಿಲ್ಲಾ ಸಮಿತಿ ತೀವ್ರವಾಗಿ ಖಂಡಿಸುತ್ತದೆ ಎಂದು ಪದಾಧಿಕಾರಿಗಳು ತಿಳಿಸಿದರು.ಪತ್ರಿಕಾಗೋಷ್ಠಿಯಲ್ಲಿ ರಾಜ್ಯ ಉಪಾಧ್ಯಕ್ಷ ವಿಮಲ್ ಕುಮಾರ್, ಜಿಲ್ಲಾ ಅಧ್ಯಕ್ಷ ಅಬ್ದುಲ್ ಖಾದರ್ ಬಿ.ಎಚ್. ಜಿಲ್ಲಾ ಸಮಿತಿ ಕಾರ್ಯದರ್ಶಿ ಅಬು ಟಿ.ಟಿ, ಗೋಪಾಲಕೃಷ್ಣನ್, ಸಲೀಂ ಚೆಮ್ನಾಡ್ ಉಪಸ್ಥಿತರಿದ್ದರು.
0 Comments