ಜೈಲಿನಲ್ಲಿ ರಿಮಾಂಡ್ ನಲ್ಲಿದ್ದ ಪೋಕ್ಸೋ ಪ್ರಕರಣದ ಆರೋಪಿ ಸಾವು : ಸಾವಿನಲ್ಲಿ ಅನುಮಾನ ಕುಟುಂಬ ಆರೋಪ

 

ಕಾಸರಗೋಡು: ಕಾಸರಗೋಡು ಸಬ್ ಜೈಲಿನಲ್ಲಿ ರಿಮಾಂಡ್ ನಲ್ಲಿ ಇರಿಸಿದ್ದ ಆರೋಪಿಯೋರ್ವ  ಮೃತಪಟ್ಟ ಬಗ್ಗೆ ವರದಿಯಾಗಿದೆ. ದೇಳಿಯ  ಕುನ್ನುಪಾರಾದ ದಿ.ಅಬ್ದುಲ್ಲಾ ಅವರ ಪುತ್ರ ಮುಬಶೀರ್ (29) ಆರೋಪಿತ ಮೃತ ಯುವಕ.  ಬುಧವಾರ ಬೆಳಿಗ್ಗೆ 5:30 ಕ್ಕೆ ಮುಬಶೀರ್ ದೈಹಿಕ ಅಸ್ವಸ್ಥತೆ ಕಾಣಿಸಿಕೊಂಡ ಹಿನ್ನಲೆಯಲ್ಲಿ ಜೈಲು ಅಧಿಕಾರಿಗಳು ಅವರನ್ನು ಕಾಸರಗೋಡು ಜನರಲ್ ಆಸ್ಪತ್ರೆಗೆ ಕರೆದೊಯ್ದಿದ್ದರು ಎನ್ನಲಾಗಿದೆ. ಆಗಲೇ ಅವರು ಮೃತಪಟ್ಟಿದ್ದರು ಎಂದು ಹೇಳಲಾಗುತ್ತಿದೆ.  ಗಲ್ಫ್‌ನಲ್ಲಿದ್ದ ಮುಬಶೀರ್ ಎರಡು ತಿಂಗಳ ಹಿಂದೆ ಸ್ವದೇಶಕ್ಕೆ ಮರಳಿದ್ದರು. ಪೋಕ್ಸೋ ಪ್ರಕರಣದಲ್ಲಿ ವಾರಂಟ್ ಇದೆ ಎಂಬ ಕಾರಣಕ್ಕೆ ಪೊಲೀಸರು ಮೂರು ವಾರಗಳ ಹಿಂದೆ ಅವರನ್ನು ಬಂಧಿಸಿದ್ದಾರೆ ಎಂದು ಸಂಬಂಧಿಕರು ತಿಳಿಸಿದ್ದಾರೆ. ನಂತರ ನ್ಯಾಯಾಲಯ ಅವರನ್ನು ರಿಮಾಂಡ್ ಮಾಡಿ ಕಾಸರಗೋಡು ಸಬ್ ಜೈಲಿಗೆ ಕಳುಹಿಸಿತು. ಸಾವಿನಲ್ಲಿ ಅನುಮಾನವಿದೆ ಎಂದು ಕುಟುಂಬ ಆರೋಪಿಸಿದೆ. ಕಾಸರಗೋಡು ನಗರ ಪೊಲೀಸರು ಮುಬಶೀರ್ ಸಾವಿನ ಬಗ್ಗೆ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. ಮೃತರು ತಾಯಿ ಹಾಜಿರಾ. ಸಹೋದರರಾದ ಮುನವ್ವರ್, ಮುಸಾಂಬಿಲ್, ಸಲ್ಮಾನ್ ಎಂಬಿವರನ್ನಗಲಿದ್ದಾರೆ.