ವಿದ್ಯುತ್ ಬಲ್ಬ್ ನೊಂದಿಗೆ ಏಕಾಂಗಿಯಾಗಿ ಚುನಾವಣಾ ಪ್ರಚಾರಕ್ಕಿಳಿದ ಗುರುವಪ್ಪ ಪೆಲ್ತಾಜೆ

 

ಚುನಾವಣಾ ವಿಶೇಷ

ಹಲವೆಡೆ ಸ್ವಂತ ಪಕ್ಷದ ಅಭ್ಯರ್ಥಿಗಳೇ ಬಂಡಾಯ ಎದ್ದು ಸ್ವತಂತ್ರ್ಯ ಅಭ್ಯರ್ಥಿಯಾಗಿ ಚುನಾವಣಾ ಕಣಕ್ಕಿಳಿದು ಪಕ್ಷದ ಜತೆ ಮತ್ತು ಕಾರ್ಯಕರ್ತರ ನಡುವೆ ಬಿಕ್ಕಟ್ಟು ಸೃಷ್ಟಿಸಿ ಇಕ್ಕಟ್ಟಿಗೆ ಸಿಲುಕಿ ಪಕ್ಷಗಳಿಂದ ಉಚ್ಛಾಟಿತರಾಗುವ ಘಟನೆಗಳು ಸಾಮಾನ್ಯವಾಗಿದೆ. ಆದರೆ ಇಲ್ಲೊಬ್ಬ ಅಭ್ಯರ್ಥಿ ತನ್ನ ಸಮುದಾಯದ ಅಹರ್ನಿಶಿ ಏಳಿಗೆಯನ್ನು ಬಯಸಿ ನೆರೆಯ ವಾರ್ಡಿನಿಂದ ಮೀಸಲಾತಿ ವಾರ್ಡಿಗೆ ನಾಮಪತ್ರ ಸಲ್ಲಿಸಿ ಅಭ್ಯರ್ಥಿಯಾಗಿದ್ದಾರೆ.ಇದು ಅಚ್ಚರಿಯಲ್ಲದ ವಿಷಯವಾಗಿರಬಹುದು ಆದರೆ ಚುನಾವಣೆಗೆ ಅಭ್ಯರ್ಥಿಯಾಗಿ ಆಯ್ಕೆಯಾದ ಇವರು ಸ್ವತಃ ಏಕಾಂಗಿಯಾಗಿ ವಾರ್ಡ್ ಗಳನ್ನು ಸುತ್ತಿ ಮತ ಯಾಚಿಸುತ್ತಿದ್ದಾರೆ. 

ಎಣ್ಮಕಜೆ ಗ್ರಾಮ ಪಂಚಾಯತ್ ನ 12 ನೇ ವಾರ್ಡು ಬಜಕೂಡ್ಲು ಪರಿಶಿಷ್ಟ ಜಾತಿ ಮೀಸಲು ಕ್ಷೇತ್ರದಿಂದ ಸ್ವತಂತ್ರ ಅಭ್ಯರ್ಥಿಯಾಗಿ ಇವರು ಸ್ಪರ್ಧಿಸುತ್ತಿದ್ದಾರೆ. ವಿದ್ಯುತ್ ಬಲ್ಬು ಇವರ ಚುನಾವಣಾ ಚಿಹ್ನೆಯಾಗಿದೆ. ಅರ್ಥಶಾಸ್ತ್ರ ಸ್ನಾತಕೋತ್ತರ  ಪದವೀಧರಾಗಿರುವ ಇವರು  ಸಂಪೂರ್ಣ ಸಾಕ್ಷರತಾ ಯಜ್ಞ, ವಾರ್ಡು ಮಟ್ಟದಿಂದಲೇ ಯೋಜನೆಗಳ ತಯಾರಿ, ಮಹಾತ್ಮಾಗಾಂಧಿ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯ ಸಂಪನ್ಮೂಲ ವ್ಯಕ್ತಿಯಾಗಿ ಪಂಚಾಯತಿನ ಎಲ್ಲ ವಾರ್ಡಿನ ಜನರ ಪರಿಚಯಕ್ಕೆ ಪಾತ್ರರಾಗಿದ್ದಾರೆ. 2 ವರ್ಷ ಶ್ರೀ ಗಿರಿಜಾಂಬಾ ಎ.ಎಲ್.ಪಿ. ಶಾಲೆಯ ಪಿಟಿಎ ಅಧ್ಯಕ್ಷರಾಗಿ 2 ವರ್ಷ ಪೆರ್ಲ ಶ್ರೀ ಸ.ನಾ. ಹೈಸ್ಕೂಲಿನ ಪಿಟಿಎ ಅಧ್ಯಕ್ಷರಾಗಿಯೂ ಸಂಘಟನಾತ್ಮಕ ಸೇವೆ ಸಲ್ಲಿಸಿದ ಅನುಭವ ಗಳಿಸಿದ್ದಾರೆ. 

ಅತೀ ಹಿಂದುಳಿದ ಪರಿಶಿಷ್ಟ ಜಾತಿ ಮೀಸಲಾತಿ ಘೋಷಿಸಿದ ವಾರ್ಡಿನಲ್ಲಿ ಇವರು ತಮ್ಮ ಸಮುದಾಯದ ಸರ್ವತೋಮುಖ ಅಭಿವೃದ್ಧಿಗಾಗಿ ಈ ಬಾರಿ ಚುನಾವಣಾ ಕಣಕ್ಕಿಳಿದಿರುವುದಾಗಿ ತಿಳಿಸುತ್ತಾರೆ. ಸನಾತನ ಧರ್ಮದ ಸಂಕೇತವಾದ ಸ್ವಸ್ವಿಕ್ ಚಿಹ್ನೆಯ ಬೇಡಿಕೆ ಇರಿಸಿದ್ದರೂ ಚುನಾವಣಾ ಆಯೋಗ ಅದನ್ನು ನೀಡಲು ನಿರಾಕರಿಸಿತ್ತು ಬಳಿಕ ಜೀಪು, ಕೊಡೆ ಮುಂತಾದವುಗಳನ್ನು ಸೂಚಿಸಿದರೂ ಅದು ಆಯೋಗ ನೀಡದಿರುವ ಕಾರಣ ಕೊನೆಗೆ ವಿದ್ಯುತ್ ಬಲ್ಬು ಚಿಹ್ನೆಯಲ್ಲಿ ಇವರು ಕಣಕಿಳಿದಿದ್ದಾರೆ. ಇವರ ಮಗನೆ ಸ್ಪರ್ಧೆಗೆ ಠೇವಣಿ ನೀಡಿದ್ದು ಚುನಾವಣಾ ಪ್ರಚಾರದ ಕನ್ವೀನರ್ ಆಗಿದ್ದಾರೆ. ಇದೀಗ ಮತ ಯಾಚನೆಯ ವಿನಂತಿ ಪತ್ರವನ್ನು ಮನೆ ಮನೆಗೆ ತಲುಪಿಸಿ ಮತ ಯಾಚಿಸುವ ಭರಾಟೆಯಲ್ಲಿ ಗುರುವಪ್ಪ ಬ್ಯುಸಿಯಾಗಿದ್ದಾರೆ.