ಎಣ್ಮಕಜೆಯ ಚುನಾವಣಾ ಸ್ಪರ್ಧಾಕಣದಲ್ಲಿ ಇಬ್ಬರು ವನಿತಾ ಯುವ ನ್ಯಾಯವಾದಿಗಳು

 

ಪೆರ್ಲ : ತ್ರಿಸ್ತರ ಪಂಚಾಯತ್ ಚುನಾವಣೆಯಲ್ಲಿ ಪ್ರಬುದ್ಧ ಅಭ್ಯರ್ಥಿಗಳನ್ನು ನಿಲ್ಲಿಸಿರುವ  ವಿವಿಧ ಪಕ್ಷಗಳ ಗಿಮಿಕ್  ಮುಂದುವರಿಯುತ್ತಿದ್ದಂತೆ ಎಣ್ಮಕಜೆಯಲ್ಲಿ ಇಬ್ಬರು ನ್ಯಾಯವಾದಿಗಳು ಸ್ಪರ್ಧಾ ಕಣದಲ್ಲಿ ಸಕ್ರಿಯರಾಗಿದ್ದಾರೆ. ಇಲ್ಲಿನ 17ನೇ ವಾರ್ಡಿನ ಐಕ್ಯರಂಗ ಅಭ್ಯರ್ಥಿ ನ್ಯಾಯವಾದಿ ಪ್ರತೀಕ್ಷಾ ಪೂಜಾರಿ ಹಾಗೂ 12ನೇ ವಾರ್ಡಿನಲ್ಲಿ ನ್ಯಾಯವಾದಿ ಪೂರ್ಣಿಮ ಸಾರಂಗ್ ಈ ಬಾರಿ ಚುನಾವಣಾ ಕಣಕ್ಕಿಳಿದ ಯುವ ಮಹಿಳಾ ನ್ಯಾಯವಾದಿಗಳಾಗಿದ್ದಾರೆ. 

ಸೇರಾಜೆ ಸಮೀಪದ ಕಾನ ಕಮಲಾಕ್ಷ ಪೂಜಾರಿ - ಪ್ರಜುಲ ದಂಪತಿಗಳ ಪುತ್ರಿಯಾದ ಪ್ರತೀಕ್ಷಾ ಪೂಜಾರಿ ಸೈಂಟ್ ಮೇರಿಸ್ ಹೈಸ್ಕೂಲ್ ಜೋಗೀಶ್ವರಿ ಈಸ್ಟ್ ಮುಂಬೈಯಲ್ಲಿ ಪ್ರಾಥಮಿಕ ಶಿಕ್ಷಣ ಗಳಿಸಿ ಬಳಿಕ ಪೆರ್ಲ ಸ.ನಾ.ಶಾಲೆಯಲ್ಲಿ ಹಾಗೂ  ಕಾಟುಕುಕ್ಕೆ ಶ್ರೀಸುಬ್ರಹ್ಮಣ್ಯೇಶ್ವರ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ಪ್ರೌಢ ಶಿಕ್ಷಣ, ಬೆಟ್ಟಂಪಾಡಿ ಸರಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಪದವಿ ಶಿಕ್ಷಣ ಪಡೆದು ಪುತ್ತೂರು ವಿವೇಕಾನಂದ ಕಾಲೇಜಿನಲ್ಲಿ 2022ರಲ್ಲಿ ಕಾನೂನು ಪದವಿ ಗಳಿಸಿದ್ದಾರೆ. ಕೇರಳ ಬಾರ್ ಕೌನ್ಸಿಲ್ ಆಫ್  ಎಂಟ್ರೋಲ್ ಮೆಂಟ್ ಪಡೆದ ಇವರು ಕಾಸರಗೋಡು ಜಿಲ್ಲಾ ನ್ಯಾಯಾಲಯದಲ್ಲಿ ಸೇವಾ ನಿರತೆಯಾಗಿದ್ದಾರೆ. 

ಎಣ್ಮಕಜೆಯ 12 ನೇ ವಾರ್ಡಿನಲ್ಲಿ  ಎಸ್. ಸಿ ಮೀಸಲಾತಿ ವಿಭಾಗದಲ್ಲಿ ಸ್ಪರ್ಧಿಸುವ  ನ್ಯಾಯವಾದಿ ಪೂರ್ಣಿಮಾ ಸಾರಂಗ್  ಕಾಸರಗೋಡು ಸರಕಾರಿ ಕಾಲೇಜಿನಲ್ಲಿಬಿಎಸ್ಸಿ  ಜಿಯೋಲಾಜಿ ಪದವಿಯನ್ನು ಪಡೆದು ಕೋಯಿಕ್ಕೋಡ್ ಸರಕಾರಿ ಕಾನೂನು ವಿದ್ಯಾಲಯದಲ್ಲಿ ಕಾನೂನು ಶಿಕ್ಷಣ ಪದವಿಯನ್ನು ಪಡೆದಿರುತ್ತಾರೆ. 2012 ರಿಂದ ವಕೀಲ ವೃತ್ತಿಯನ್ನು ಮಾಡುತ್ತಿದ್ದಾರೆ. ಕೇರಳ ಸರಕಾರದ ಪರಿಶಿಷ್ಟ ಜಾತಿ ಇಲಾಖೆಯ ಕಾಸರಗೋಡು ಜಿಲ್ಲಾ ಪರಿಶಿಷ್ಟ ಜಾತಿ ಕಾನೂನು ಕೌನ್ಸಿಲರ್ ಅಧಿಕಾರಿಯಾಗಿ ಸೇವೆ ಸಲ್ಲಿಸಿದ್ದಾರೆ. ಪ್ರಸಿದ್ಧ ರಂಗಭೂಮಿ ನಿರ್ದೇಶಕ ಸಾಹಿತಿ ಪೆರ್ಲ ಶಾಲಾ ಶಿಕ್ಷಕ ಉದಯ ಸಾರಂಗ್ ರವರ ಧರ್ಮಪತ್ನಿಯಾಗಿರುವ ಪೂರ್ಣಿಮ ಚುನಾವಣಾ ಪ್ರಚಾರ ಕಾರ್ಯದಲ್ಲಿ ಸಕ್ರಿಯರಾಗಿದ್ದಾರೆ.