ಹಾಲಿ ಜನಪ್ರತಿನಿಧಿಯಿಂದ ಬಿಎಲ್ ಒ ಗೆ ತಪರಾಕಿ : ವಿಡಿಯೋ ವೈರಲ್ - ಜಿಲ್ಲಾಧಿಕಾರಿಗೆ ದೂರು

 

ಕಾಸರಗೋಡು: ಬಿಎಲ್‌ಒ ಅವರ ಕಾಲರ್ ಹಿಡಿದು ಹಲ್ಲೆಗೆ ಯತ್ನಿಸಿದ ಘಟನೆಯೊಂದು ವರದಿಯಾಗಿದೆ. ದೇಲಂಪಾಡಿ ಪಂಚಾಯತ್‌ನ  ಪಯರಡ್ಕ ಬೂತ್‌ನ  ಬಿಎಲ್‌ಒ ಆಗಿರುವ ಅಜಿತ್ ಎಂಬವರ ಮೇಲೆ ಹಲ್ಲೆಗೆತ್ನ ನಡೆದಿರುವುದಾಗಿ ತಿಳಿದು ಬಂದಿದೆ. ಈ ಬಗ್ಗೆ ಘಟನೆಯ ವಿಡಿಯೋ ಒಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಅಗುತ್ತಿದೆ. ಘಟನೆಗೆ ಸಂಬಂಧಿಸಿದಂತೆ ಅಜಿತ್ ಜಿಲ್ಲಾಧಿಕಾರಿಗಳಿಗೆ ದೂರು ನೀಡಿರುವುದಾಗಿ ತಿಳಿಸಿದ್ದಾರೆ. ದೂರುದಾರ ಬಿಎಲ್ ಒ ಅಜಿತ್, ಬಂದಡ್ಕದ ಬಿವರೇಜಸ್ ಕಾರ್ಪೊರೇಷನ್ ನ  ಉದ್ಯೋಗಿಯಾಗಿದ್ದಾರೆ.  ಗುರುವಾರ ಬೆಳಿಗ್ಗೆ ಬೂತ್ ಕ್ಯಾಂಪ್‌ನಲ್ಲಿ ಈ ಘಟನೆ ನಡೆದಿದೆ. ಈ ಬೂತ್‌ನಲ್ಲಿ ಪುಷ್ಪಾ ಎಂಬ ಇಬ್ಬರು ಮತದಾರರಿದ್ದಾರೆ. ಅವರಲ್ಲಿ ಒಬ್ಬರು ಎಸ್‌ಐಆರ್ ಫಾರ್ಮ್ ಸಲ್ಲಿಸಿದ್ದರು. ಎರಡನೇ ವ್ಯಕ್ತಿಯ ಫಾರ್ಮ್ ಅನ್ನು ಬೇರೊಬ್ಬರು ಕಳುಹಿಸಿದ್ದಾರೆ. ದೇಲಂಪಾಡಿ ಪಂಚಾಯತ್ ಸ್ಥಾಯಿ ಸಮಿತಿಯ ಅಧ್ಯಕ್ಷ ಸುರೇಂದ್ರನ್ ಅವರು ಈ ಬಗ್ಗೆ ಪ್ರಶ್ನಿಸಿ ತನ್ನ ಮೇಲೆ ಹಲ್ಲೆಗೆ ಯತ್ನಿಸಿದ್ದಾರೆ ಎಂದು ಅಜಿತ್ ತಮ್ಮ ದೂರಿನಲ್ಲಿ ತಿಳಿಸಿದ್ದಾರೆ. ಜಿಲ್ಲಾಧಿಕಾರಿಗಳ ಸೂಚನೆಯಂತೆ ಪೊಲೀಸರು ಕ್ರಮ ಕೈಗೊಳ್ಳಲು ನಿರ್ಧರಿಸಿದ್ದಾರೆ.