ಕಾಂಗ್ರೆಸ್ ನಲ್ಲಿ ಬಂಡಾಯ : ಕುಂಬಳೆಯಲ್ಲಿ ಮೂವರ ಉಚ್ಛಾಟನೆ

 ಕುಂಬಳೆ : ಕುಂಬಳೆ ಗ್ರಾ. ಪಂ. ಚುನಾವಣೆಯಲ್ಲಿ ಯುಡಿಎಫ್ ನಲ್ಲಿ ಪರಸ್ಪರ ಒಳಗೊಳಗೆ ಮುಸುಕಿನ ಗುದ್ದಾಟ ನಡೆಯುತ್ತಿದ್ದು ಸ್ಥಳೀಯವಾಗಿ ಯುಡಿಎಫ್ ಔದ್ಯೋಗಿಕ ಅಭ್ಯರ್ಥಿಗಳ ವಿರುದ್ಧ ಸ್ಪರ್ಧಿಸುವ ಮತ್ತು ರಂಗಕ್ಕಿಳಿದ ಮೂವರು ಕಾಂಗ್ರೆಸಿಗರನ್ನು ಪಕ್ಷದ ಪ್ರಾಥಮಿಕ ಸದಸ್ಯತ್ವದಿಂದ ಡಿಸಿಸಿ ಉಚ್ಛಾಟಿಸಿದೆ. ಕುಂಬಳೆ ಪೇಟೆಯ ರೈಲ್ವೇ ಸ್ಟೇಷನ್ ವಾರ್ಡು (18ನೇ ವಾರ್ಡು) ಪಕ್ಷೇತರ ಅಭ್ಯರ್ಥಿ ಸಮೀರ ರಿಯಾಸ್, ಇವರ ಪತಿ ಕುಂಬಳೆ ಮಂಡಲ ಕಾಂಗ್ರೆಸ್ ಕಾರ್ಯದರ್ಶಿ ರಿಯಾಸ್ ಹಾಗೂ ಮುಳಿಯಡ್ಕ ವಾರ್ಡಿನಲ್ಲಿ ಯುಡಿಎಫ್ ನ ಕಾಂಗೈ ಅಭ್ಯರ್ಥಿ ವಿರುದ್ಧ ರಂಗಕ್ಕಿಳಿದಿರುವ ಕಾಂಗ್ರೆಸ್ ಕಾರ್ಯಕರ್ತ ಕೇಶವ ದರ್ಬಾರ್ ಕಟ್ಟೆ ಇವರನ್ನು ಪಕ್ಷದಿಂದ ಅಮಾನತುಗೊಳಿಸಲಾಗಿದೆ. ಪಕ್ಷದ ಶಿಸ್ತು ಉಲ್ಲಂಘನೆ ಮತ್ತು ಯುಡಿಎಫ್ ಒಕ್ಕೂಟ ವ್ಯವಸ್ಥೆಯ ಉಲ್ಲಂಘನೆಯ ಹಿನ್ನೆಲೆಯಲ್ಲಿ ಕೆಪಿಸಿಸಿ ನಿರ್ದೇಶನ ಪ್ರಕಾರ  ಈ ಕ್ರಮ ಕೈಗೊಂಡಿರುವುದಾಗಿ ಅಧಿಕೃತ ಪ್ರಕಟಣೆ ತಿಳಿಸಿದೆ.