ಭಾಜಪದತ್ತ ಒಲವು ಬೆಳೆಸಿ ಚುನಾವಣಾ ಕಣಕ್ಕಿಳಿದ ಅಲ್ಪ ಸಂಖ್ಯಾತ ಅಭ್ಯರ್ಥಿಗಳು

 

ಕಾಸರಗೋಡು : ತ್ರಿಸ್ತರ ಪಂಚಾಯತ್ ಚುನಾವಣೆ ಸಮೀಪಿಸುತ್ತಿದ್ದಂತೆ ಅಲ್ಪಸಂಖ್ಯಾತ ವಿಭಾಗದ ಮತದಾರರು ಕೇಂದ್ರಾಡಳಿತ ಪಕ್ಷವಾದ  ಭಾಜಪದತ್ತ ಒಲವು ತೋರಿಸುತ್ತಿರುವುದು ಜಿಲ್ಲೆಯಲ್ಲೊಂದು ಅಚ್ಚರಿಯ ಬೆಳವಣಿಗೆಯಾಗಿದೆ. ಉತ್ತರ ಕೇರಳದಲ್ಲಿ ಈ ಹಿಂದಿನ ವಿಧಾನಸಭಾ, ಲೋಕಸಭಾ ಚುನಾವಣೆಯ ಸಂದರ್ಭದಲ್ಲಿಯೇ ಕ್ರೈಸ್ತ ಧರ್ಮೀಯರು ಬಿಜೆಪಿಗೆ ಪಕ್ಷಾಂತರವಾಗಿರುವುದು ಸುದ್ದಿಯಾಗಿದ್ದರೂ ಇದೀಗ ಕಾಸರಗೋಡು, ಮಂಜೇಶ್ವರ ಭಾಗದಲ್ಲಿರುವ ಕೆಥೋಲಿಕ್ ಕ್ರೈಸ್ತರು ಈ ರಾಷ್ಟ್ರೀಯ ಪಕ್ಷದತ್ತ ಒಲವು ಬೆಳೆಸುತ್ತಿರುವುದು ಈ ಬಾರಿಯ ಚುನಾವಣೆಯ ವಿಶೇಷತೆಯಾಗಿದೆ.  ಬದಿಯಡ್ಕ ಗ್ರಾಮ ಪಂಚಾಯತಿನ‌ 21ನೇ ವಾರ್ಡ್ ಸೀತಾಂಗೋಳಿಯಲ್ಲಿ ಬಿಜೆಪಿ ಅಭ್ಯರ್ಥಿಯಾಗಿ ರೋಮನ್ ಡಿಸೋಜ ಸ್ಪರ್ಧಾ ಕಣದಲ್ಲಿದ್ದಾರೆ. ಅದೇ ರೀತಿ ಪೈವಳಿಕೆ ಗ್ರಾಮ ಪಂಚಾಯತಿನ 16ನೇ ವಾರ್ಡ್ ಕೊಕ್ಕೆಜಾಲಿನಲ್ಲಿ ವಿಲ್ಮಾ ಡಿ'ಕುನ್ಹಾ ಬಿಜೆಪಿ ಅಭ್ಯರ್ಥಿಯಾಗಿ ಮತ ಯಾಚಿಸುತ್ತಿದ್ದಾರೆ. 

ಈ ಹಿಂದಿನಿಂದಲೂ ಮಂಜೇಶ್ವರ, ಮೀಂಜ, ವರ್ಕಾಡಿ, ಪೈವಳಿಕೆ, ಪುತ್ತಿಗೆ, ಎಣ್ಮಕಜೆ, ಬದಿಯಡ್ಕ, ಕುಂಬ್ಡಾಜೆ, ಬೆಳ್ಳೂರು ಗ್ರಾಮ ಪಂಚಾಯತ್ ವ್ಯಾಪ್ತಿಯಲ್ಲಿದ್ದವರು ಪರಂಪರಾಗತವಾಗಿ ಐಕ್ಯರಂಗ ಅಥವಾ  ಎಡರಂಗದಲ್ಲಿದ್ದ  ಕ್ರೈಸ್ತ ಕುಟುಂಬಗಳು ಇದೀಗ ಭಾಜಪ ಪಕ್ಷದತ್ತ ಒಲವು ಬೆಳೆಸಿಕೊಂಡಿರುವುದು ಅಚ್ಚರಿಯ ಬೆಳವಣಿಗೆಯಾಗಿದೆ. ಈ ಭಾಗದೆಲ್ಲೆಡೆ ಹೆಚ್ಚಿನವರು ಪರೋಕ್ಷವಾಗಿ ಬಿಜೆಪಿಯೊಡನೆ ನಂಟು ಬೆಳೆಸಿಕೊಂಡಿದ್ದರೂ ಹಲವರು ತಮ್ಮ ಪಾರ್ಟಿ ತೊರೆದು ಬಹಿರಂಗವಾಗಿ ಬಿಜೆಪಿ ಸೇರ್ಪಡೆಗೊಂಡಿರುವುದು ಉಳಿದ ಪಕ್ಷಗಳತ್ತ ತಮ್ಮ ನಿಲುವನ್ನು ವ್ಯಕ್ತಪಡಿಸಿದಂತಾಗಿದೆ. ಈ ಹಿಂದಿನಿಂದಲೂ ಎಡ ಹಾಗೂ ಬಲ ಪಕ್ಷಗಳು ಈ ವಿಭಾಗಕ್ಕೆ ಸೂಕ್ತ ಸ್ಥಾನಮಾನ ಹಾಗೂ ಸೌಲಭ್ಯ, ಸವಲತ್ತು ಕಲ್ಪಿಸದ ಕಾರಣ ಬೇಸತ್ತು ಭಾಜಪದತ್ತ ಒಲವು ಬೆಳೆಸಲು ಕಾರಣ ಎನ್ನಲಾಗುತ್ತಿದೆ.  ಕ್ರೈಸ್ತರ ಶಕ್ತಿ ಕೇಂದ್ರಗಳಲ್ಲಿಯೇ ಈ ರೀತಿಯ ಬೆಳವಣಿಗೆ ಈ ಚುನಾವಣೆಯನ್ನು ಮಾತ್ರವಲ್ಲದೆ ಮುಂದಿನ  ವಿಧಾನಸಭಾ, ಲೋಕ ಸಭಾ ಚುನಾವಣೆಯನ್ನೂ  ಮಾರ್ಮಿಕವಾಗಿ ಬಾಧಿಸುವಂತದ್ದಾಗಿದೆ ಎಂಬುದು ಇದೀಗ ಚುನಾವಣಾ ವೀಕ್ಷಕರ ಅಭಿಪ್ರಾಯವಾಗಿದೆ.