ಮತದಾರ ಯಾದಿ ತೀವ್ರ ಪರಿಷ್ಕೃತ ಪ್ರಕ್ರಿಯೆಯಲ್ಲಿ 15 ದಿನಗಳೊಳಗೆ ನೂರು ಶೇಖಡ ಸಾಧನೆ - ಅಂಗಡಿಮೊಗರು ಬಿಎಲ್ ಒ ನ ಪ್ರಯತ್ನಕ್ಕೆ ಎಲ್ಲೆಡೆ ಪ್ರಶಂಸೆ

 

ಪುತ್ತಿಗೆ : ಚುನಾವಣೆಯ ಅಂಗವಾಗಿ ಮತದಾರ ಯಾದಿ  ತೀವ್ರ ಪರಿಷ್ಕೃತ ಪ್ರಕ್ರಿಯೆಯಲ್ಲಿ ಬಿಎಲ್ ಒ ಗಳು ವಿವಿಧ ಸಂಕಷ್ಟಗಳನ್ನು ಅನುಭವಿಸುತ್ತಾ ದಿನಗಳೆಯುತ್ತಿರುವ ನಡುವೆ ಸೀಮಿತ  15 ದಿನಗಳೊಳಗೆ ವಾರ್ಡ್ ವ್ಯಾಪ್ತಿಯ ಎಲ್ಲಾ ಮತದಾರರ ಪರಿಷ್ಕರಣೆ ನಡೆಸಿ ಸರಕಾರಿ ವೆಬ್ ಸೈಟ್ ಗೆ ಆಪ್ ಲೋಡ್ ಮಾಡಿ ನೂರು ಶೇಖಡ ಸಾಧನೆ ಮಾಡಿದ ಕೀರ್ತಿ ಪುತ್ತಿಗೆ ಪಂಚಾಯತಿನ 170ನೇ ಬೂತ್ ನ  ಅಂಗಡಿಮೊಗರು  ಬಿಎಲ್ ಒ ನ ಪ್ರಯತ್ನಕ್ಕೆ ಎಲ್ಲೆಡೆ ಪ್ರಶಂಸೆ ಮೂಡಿ ಬರುತ್ತಿದೆ. ಮೂಲತಃ ಅಂಗಡಿಮೊಗರು ನಿವಾಸಿ ಇದೀಗ ಸರಕಾರಿ ಕಿರಿಯ ಪ್ರಾಥಮಿಕ ಶಾಲೆ ಅಣಂಗೂರು ಇದರ ಶಿಕ್ಷಕ ವಿಖ್ಯಾತ್ ಬಿ.ರೈ ಈ ರೀತಿ ಸರಕಾರಿ ನಿಬಂಧಿತ ದಿನಗಳ ಮುಂಚಿತವಾಗಿಯೇ ಪರಿಷ್ಕೃತ ನಾಮ ನಿರ್ದೇಶಿಸಿ ನೂರು ಶೇಖಡ ಸಾಧನೆ ಮಾಡಿದವರು. ಕಳೆದ ಒಂದು ವರ್ಷಗಳ ಹಿಂದೆಯಷ್ಟೆ ಇವರು ಬಿಎಲ್ ಒ ಕರ್ತವ್ಯಕ್ಕೆ ಆಯ್ಕೆಯಾಗಿದ್ದರು. ಅರ್ಜಿ ವಿತರಣೆಯ  ಆರಂಭದಲ್ಲಿ ಸ್ಥಳೀಯ ಸಂಘ ಸಂಸ್ಥೆ ಕ್ಲಬ್ ಗಳು ಸಹಕರಿಸಿದ್ದು, ಪುನಃ ಅರ್ಜಿ ಸಂಗ್ರಹಿಸಿದ ಮೂರು ದಿನಗಳಲ್ಲಿ 1090 ಮತದಾರರ ಪರಿಷ್ಕೃತ ಅರ್ಜಿಯನ್ನು ಚುನಾವಣಾ ಆಯೋಗಕ್ಕೆ ಸಲ್ಲಿಸಿ ಇತರರಿಗೆ ಆದರ್ಶರಾಗಿದ್ದಾರೆ. ಇವರ ಈ ಪ್ರಯತ್ನವನ್ನು ಕಾಸರಗೋಡು ಜಿಲ್ಲಾಧಿಕಾರಿ, ಮಂಜೇಶ್ವರ ಶಾಸಕರು, ತಹಶೀಲ್ದಾರರು ಅಭಿನಂದಿಸಿದ್ದಾರೆ.