ರೈಲ್ವೆ ಸಿಗ್ನಲ್ ಕೇಬಲ್ ಕತ್ತರಿಸಿದ ಆರೋಪಿಯನ್ನು ಸೆರೆ ಹಿಡಿದ ಪೊಲೀಸ್ ನಾಯಿ

 

ಕಾಸರಗೋಡು : ನೀಲೇಶ್ವರ  ರೈಲ್ವೆ ಹಳಿಯಲ್ಲಿ ಸ್ಥಾಪಿಸಲಾಗಿದ್ದ ಸಿಗ್ನಲ್ ಕೇಬಲ್ ಕತ್ತರಿಸಿದ ವ್ಯಕ್ತಿಯನ್ನು ಪೊಲೀಸ್ ನಾಯಿಯ ಸಹಾಯದಿಂದ ಸಾಹಸಿಕವಾಗಿ ಸೆರೆ ಹಿಡಿಯಲಾಗಿದೆ. ರೈಲ್ವೆ ರಕ್ಷಣಾ ಪಡೆಯ ಲಾರಾ ಎಂಬ ನಾಯಿ ಕಳ್ಳನನ್ನು ಹಿಡಿದಿದೆ. ಕತ್ತರಿಸಿದ ಕೇಬಲ್‌ನಿಂದ ವಾಸನೆ ಹಿಡಿದು  ಲಾರಾ ಸುಮಾರು ಒಂದು ಕಿಲೋಮೀಟರ್ ದೂರದ ವಸತಿ ಪ್ರದೇಶಕ್ಕೆ ಹೋಗಿತ್ತು. ರೈಲ್ವೆ ಪೊಲೀಸರು ಅಲ್ಲಿಂದ ಆರೋಪಿಯನ್ನು ಸೆರೆ ಹಿಡಿದಿದ್ದಾರೆ. ನೀಲೇಶ್ವರದಲ್ಲಿ ವಾಸಿಸುವ ಕಣ್ಣೂರು ಮೂಲದ ಜಿ. ಸ್ಟೀಫನ್ ಕುಟ್ಟಣ್ಣ (22) ಬಂಧಿತ ಆರೋಪಿ.  ಸಿಗ್ನಲ್ ಕೊರತೆಯಿಂದಾಗಿ ಆ ದಿನ ವಂದೇ ಭಾರತ್ ಎಕ್ಸ್‌ಪ್ರೆಸ್ ಅನ್ನು ನೀಲೇಶ್ವರದಲ್ಲಿ ಮತ್ತು ಮಂಗಳ ಎಕ್ಸ್‌ಪ್ರೆಸ್ ನ್ನು ಕಾಞಂಗಾಡ್‌ನಲ್ಲಿ ನಿಲ್ಲಿಸಬೇಕಾಗಿ ಬಂದಿತ್ತು. ನಂತರದ ತನಿಖೆಯಲ್ಲಿ ನೀಲೇಶ್ವರ ಸೇತುವೆಯ ಬಳಿ ರೈಲ್ವೆ ಕೇಬಲ್ ತುಂಡಾಗಿರುವುದು ಕಂಡು ಬಂದಿತ್ತು. ಕೇಬಲ್‌ನಲ್ಲಿ ತಾಮ್ರ ಇರುವ ಕಾರಣ ಕದ್ದೊಯ್ದಿರುವುದಾಗಿ ಆರೋಪಿ ಪೋಲಿಸರಿಗೆ ತಿಳಿಸಿದ್ದಾನೆ.