ಪ್ರತಿಯೊಂದು ಊರಿನಲ್ಲೂ ಅದರದ್ದೇ ಆದ ವಿಶೇಷ ಜಾನಪದ ಕಲೆಗಳಿವೆ. ಅದರಂತೆ ತುಳುನಾಡಿನಲ್ಲೂ ಕೂಡ ತನ್ನದೇ ಆದ ವಿಶಿಷ್ಟ ಆಚರಣೆ, ಸಂಪ್ರದಾಯ ಹಾಗೂ ಜನಪದ ಕಲೆಗಳನ್ನು ಕಾಣಬಹುದಾಗಿದೆ. ಜುಲೈ ಮತ್ತು ಆಗಸ್ಟ್ ತಿಂಗಳೆಂದರೆ ದಕ್ಷಿಣ ಕನ್ನಡದಲ್ಲಿ ಆಟಿ ತಿಂಗಳ ಕಾಲ. ಈ ತಿಂಗಳಲ್ಲಿ ತೀವ್ರ ಮಳೆಯಿಂದಾಗುವ ವಿಪತ್ತುಗಳು ಹೆಚ್ಚು. ಹಿಂದಿನಿಂದಲೂ ಈ ತಿಂಗಳಿನಲ್ಲಿ ಮದುವೆ ಮತ್ತು ಇನ್ನಿತರ ಯಾವುದೇ ಶುಭ ಸಮಾರಂಭಗಳು ನಡೆಯುವುದಿಲ್ಲ. ಹಿಂದಿನ ಕಾಲದಲ್ಲಿ ಈ ಸಮಯ ಬಹಳ ಕಷ್ಟಕರವಾದ ದಿನ. ಕೃಷಿ ಭೂಮಿಗೆ ಹೋಗಿ ಕೃಷಿಯನ್ನು ಮಾಡಲು ಸಾಧ್ಯವಾಗುತ್ತಿರಲಿಲ್ಲ. ಏಕೆಂದರೆ ಎಡೆ ಬಿಡದೆ ಸುರಿಯುವ ಮಳೆಯಿಂದಾಗಿ ಅನೇಕ ವಿಪತ್ತುಗಳು ಎದುರಾಗುತ್ತಿದ್ದವು. ಜೊತೆಗೆ ಈ ಮಾಸದಲ್ಲಿ ಜನರು ಆನಾರೋಗ್ಯಕ್ಕೂ ಹೆಚ್ಚು ತುತ್ತಾಗುತ್ತಿದ್ದರು. ಹಾಗಾಗಿ ಇಂತಹ ಕಷ್ಟದ ಸಮಯದಲ್ಲಿ ಜನರಿಗೆ ಸಾಂತ್ವನ ಹೇಳಲೆಂದೇ ಮನೆ ಮನೆಗೆ ಆಟಿ ಕಳೆಂಜ ವೇಷಧಾರಿ ಬರುತ್ತಿದ್ದರು.
ಏನಿದು ಆಟಿ ಕಳೆಂಜ.. ??
ಆಟಿ ಕಳೆಂಜನ ಜೊತೆಗೆ ತೆಂಬರೆ ಎಂಬ ಒಂದು ಬಗೆಯ ಡೋಲನ್ನು ಹಿಡಿದು ಪಾರ್ದನ ಹಾಡುವವರು ಕೂಡಾ ಇಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ. ಇವರು ತಮ್ಮ ಪಾರ್ದನದ ಮೂಲಕ ಊರಿನಲ್ಲಿನ ಜನರು, ಜಾನುವಾರುಗಳಿಗೆ ಯಾವುದೇ ರೀತಿಯಲ್ಲಿ ಬರುವ ರೋಗ ರುಜಿನಗಳನ್ನು ನೀನು ದೂರ ಮಾಡು ಕಳೆಂಜ ಎಂದು ಆಟಿ ಕಳೆಂಜನಲ್ಲಿ ಪ್ರಾರ್ಥಿಸುತ್ತಾರೆ. ಮನೆಮನೆಗೆ ಆಟಿ ಕಳೆಂಜ ಭೇಟಿ ಕೊಡುವಾಗ ಪ್ರತಿಯೊಂದು ಮನೆಯವರು ಕೂಡಾ ಅಕ್ಕಿ, ತೆಂಗಿಕಾಯಿ, ಮೆಣಸು, ಉಪ್ಪು ಜೊತೆಗೆ ಸ್ವಲ್ಪ ಇದ್ದಿಲನ್ನು ಕಾಣಿಕೆಯಾಗಿ ಕೊಡುವ ಸಂಪ್ರದಾಯವಿದೆ. ಹೀಗೆ ಊರೆಲ್ಲಾ ಸುತ್ತಾಡುತ್ತಾ, ಆಟಿಯ ಕಷ್ಟದ ದಿನದಲ್ಲಿ ಊರಿನ ಜನರಿಗೆಲ್ಲಾ ಸಾಂತ್ವನ ಹೇಳುವ ಕೆಲಸವನ್ನು ಕಳೆಂಜ ಮಾಡುತ್ತಾರೆ. ಆಟಿಯ ಕೊನೆಯ ದಿನವಾದ
ಪೌರ್ಣಮಿಯ ದಿನದಂದು ಆಟಿ ಕಳೆಂಜ ವೇಷಕ್ಕೆ ತೆರೆ ಬೀಳುತ್ತದೆ. ಊರಿನವರು ನೀಡಿದ ಕಾಣಿಕೆಯ ಸ್ವಲ್ಪ ಭಾಗವನ್ನು ನೆಕ್ಕಿ ಎಂಬ ಹೆಸರಿನ ಮರದ ಎಲೆಯಲ್ಲಿಟ್ಟು, ಅದನ್ನು ಭೂತ ಕಲ್ಲಿಗೆ ನೈವೇದ್ಯವಾಗಿ ನೀಡುತ್ತಾರೆ. ಊರಿಗೆ ಬಂದಿರುವ ಮಾರಿ ದೂರವಾಗಲೆಂದು ದೈವದ ಬಳಿ ಮನಸಾರೆ ಪ್ರಾರ್ಥಿಸುತ್ತಾರೆ.
ವಿಪರ್ಯಾಸವೆಂದರೆ, ಆಧುನಿಕತೆಯ ಈ ಕಾಲದಲ್ಲಿ ಇಂತಹ ಆಚರಣೆ ಈಗ ಕಾಣಸಿಗುವುದೇ ಅಪರೂಪವಾಗಿಬಿಟ್ಟಿದೆ.ಆದರೂ ಕಾಸರಗೋಡಿನ,ದ.ಕ.ಉಡುಪಿ ಜಿಲ್ಲೆಯ ಹಲವೆಡೆ ನಲಿಕೆ ಸಮುದಾಯದವರು ಈ ಆಟಿ ಕಳಂಜನನ್ನು ಕಟ್ಟಿ ಮನೆ ಮನೆಗೆ ಕೊಂಡೊಯ್ಯುವುದನ್ನು ಸಂಪ್ರದಾಯವಾಗಿರಿಸಿದ್ದಾರೆ.
ಬರಹ : ಶ್ರೀಜ ಪೆರ್ಲ
ಚಿತ್ರಗಳು : ಶ್ರೀಕಾಂತ್ ಕಾಸರಗೋಡು (ಪೋಟೋ ಜರ್ನಲಿಸ್ಟ್ ವಾರ್ತ ಮಾಹಿತಿ ಇಲಾಖೆ ಕಾಸರಗೋಡು)
0 Comments