ರಾಷ್ಡ್ರ ರಕ್ಷಣೆಯ ಸಂಕಲ್ಪಕ್ಕಾಗಿ ಉಡುಪಿಯಲ್ಲಿ ಪ್ರಧಾನಿ ಮೋದಿಗೆ "ಭಾರತ ಭಾಗ್ಯವಿಧಾತ" ಪ್ರಶಸ್ತಿ ಪ್ರದಾನ

 

ಉಡುಪಿ: ಭಾರತದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಶುಕ್ರವಾರ ಪೂರ್ವಾಹ್ನ ತುಳುನಾಡಿನ ಆಧ್ಯಾತ್ಮಿಕ ತಾಣ ಉಡುಪಿಗೆ ಭೇಟಿ‌ ನೀಡಿದ್ದು  ಮಧ್ವಾಚಾರ್ಯ ಪ್ರತಿಷ್ಠಾಪಿತ ಕೃಷ್ಣಾನಗರಿಯಲ್ಲಿ ಸಹಸ್ರ ಜನ ಸಹಭಾಗಿತ್ವ ಭಾವೈಕ್ಯತೆಗೆ ಸಾಕ್ಷಿಯಾಯಿತು. ಉಡುಪಿಯ ಶ್ರೀಕೃಷ್ಣ ಮಠದ ಪರ್ಯಾಯ ಪುತ್ತಿಗೆ ಮಠಾಧೀಶ ಸುಗುಣೇಂದ್ರ ತೀರ್ಥ ಸ್ವಾಮೀಜಿ ಅವರು ಹಮ್ಮಿಕೊಂಡಿರುವ ಲಕ್ಷಕಂಠ ಗೀತಾ ಪಠಣ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಭಗವದ್ಗೀತೆಯ 15ನೇ ಅಧ್ಯಾಯ ಪುರುಷೋತ್ತಮ ಯೋಗವನ್ನು ಪಠಿಸಿದ್ದು ನೆರೆದ ಕೃಷ್ಣ ಭಕ್ತರು ಏಕ ಕಂಠದಲ್ಲಿ ಸಾಥ್ ನೀಡಿದರು.

ಕೃಷ್ಣಮಠಕ್ಕೆ ಭೇಟಿ ನೀಡಿ ಕನಕ ನವಗ್ರಹ ಕಿಂಡಿಯ ಮೂಲಕ ಕೃಷ್ಣ ದರ್ಶನ ಮಾಡಿ ಮಧ್ವ ಸರೋವರ ವೀಕ್ಷಿಸಿ, ಮುಖ್ಯಪ್ರಾಣ ಹಾಗೂ ಗರುಡ ದೇವರ ದರ್ಶನಗೈದು ಭಕ್ತಿ ಭಾವ ಪರವಶರಾದರು. ನಂತರ ಸಭಾಂಗಣಕ್ಕೆ ಆಗಮಿಸಿದ ಮೋದಿಯವರನ್ನು ನೆರೆದ ಬೃಹತ್ ಸಭಾ ಕಾರ್ಯಕ್ರಮದಲ್ಲಿ ಜಗದ್ಗುರು ಶ್ರೀ ಸುಗುಣೇಂದ್ರ ತೀರ್ಥ ಸ್ವಾಮೀಜಿ ಅವರು ಮೋದಿ ಮಹೋದಯ ಅರ್ಜುನನಿಗೆ ಸಮ. ಕುರುಕ್ಷೇತ್ರ ಯುದ್ದ ಸಂದರ್ಭದಲ್ಲಿ ದೈನ್ಯನಾಗಿ ಕೃಷ್ಣನ‌ ಭಗವದ್ಗೀತೆ ಉಪದೇಶವನ್ನು ಆಲಿಸಿದ ಅರ್ಜುನ ಯುದ್ದ ಜಯಿಸಲು ನಡೆಸಿದ ಹೋರಾಟ ಅವಿಸ್ಮರಣೀಯ ಅದರಂತೆ ಇಂದು ಭಾರತದ ಹೊಣೆಗಾರಿಕೆಯನ್ನು ವಹಿಸಿಕೊಂಡು ಜನ ಕ್ಷೇಮಕ್ಕಾಗಿ ಹೋರಾಡುತ್ತಿರುವ ಮೋದಿಜಿ 17 ವರ್ಷಗಳ  ಬಳಿಕ ಕೃಷ್ಣನೂರಿಗೆ ಬರುತ್ತಿರುವುದಾದರೂ ಪ್ರಧಾನಿಯಾಗಿ ಮೊದಲ ಬಾರಿಗೆ ಆಗಮಿಸುತ್ತಿರುವುದು 14 ವರ್ಷ ಬಳಿಕ ವನವಾಸ ಕಳೆದು ರಾಮ ಆಯೋಧ್ಯೆಗೆ ಆಗಮಿಸಿದ್ದನ್ನು ನೆನಪಿಸುತ್ತದೆ ಎಂದರು. ಈ ನಡುವೆ ಅಯೋಧ್ಯಾ ನಗರಿಯನ್ನು ಪುನರ್ ನಿರ್ಮಿಸಿದ ಮೋದಿಜೀಯವರ ನೇತೃತ್ವದ ಕೆಲಸ ಕಾರ್ಯವನ್ನು ಶ್ಲಾಘಿಸಲಾಯಿತು. ಪ್ರಧಾನಿಯಾಗಿ ದಕ್ಷ ಆಡಳಿತದಲ್ಲಿ ಅಯೋಧ್ಯೆ, ವಾರಾಣಾಸಿಯಂತೆ ಉಡುಪಿಯನ್ನು ಅಭಿವೃದ್ಧಿಗೊಳಿಸಬೇಕೆಂದು ಆಗ್ರಹಿಸಿದರು. ಈ ಸಂದರ್ಭದಲ್ಲಿ ಶ್ರೀಗಳು ಕೃಷ್ಣಾನುಗ್ರಹದ "ಭಾರತ ಭಾಗ್ಯವಿಧಾತ" ಬಿರುದು  ನೀಡಿ ಸನ್ಮಾನಿಸಿದರು. ಸನ್ಮಾನದ ಸಂದರ್ಭ ರಾಷ್ಟ್ರ ರಕ್ಷಣೆಗೆ ಕೈಗೆ ವಿಶೇಷ ರಕ್ಷೆ, ಕೃಷ್ಣನ ಪ್ರತೀಕದ ಕಡೆಗೋಲು,  ನವಿಲು ಕೀರಿಟ, ಕೃಷ್ಣನ ಸುಂದರ ಚಿತ್ರ ಹಾಗೂ  ಮಾಧ್ವ ಸಂಪ್ರದಾಯದ ತಿಲಕ ಅಂಗಾರಕ ಅಕ್ಷತೆ ಸಲ್ಲಿಸಲಾಯಿತು.

ಕೃತಾರ್ಥ ಭಾವದಿಂದ ಸ್ವೀಕರಿಸಿದ ಪ್ರಧಾನಿಯವರು "ಎಲ್ಲರಿಗೂ ನಮಸ್ಕಾರ" ಎಂದು ಮಾತು ಆರಂಭಿಸಿದರು. ಉಡುಪಿಯ ಭೇಟಿ ತನ್ನ ಬದುಕಿನ ಆಧ್ಯಾತ್ಮಿಕ ವರ್ಚಸ್ಸಿನ ವೃದ್ಧಿಗೆ ಕಾರಣವಾಗಿದೆ ಎಂದರು. ಹಲವು ದಶಕಗಳಿಂದಲೂ ಉಡುಪಿಯ ಸ್ವಚ್ಛತೆ ದೇಶಕ್ಕೆ ಮಾದರಿಯಾಗಿದೆ. ಲಕ್ಷ ಭಗವದ್ಗಿತೆ ಪಾರಾಯಣ ಅಭಿಯಾನ ಸನಾತನ ಪರಂಪರೆಗೊಂದು ಕೊಡುಗೆಯಾಗಿದ್ದು ಯುವ ಜನಾಂಗಕ್ಕೆ ಬಹುದೊಡ್ಡ ಪ್ರೇರಣೆ ಎಂದರು. 

ಸಭೆಯಲ್ಲಿ ಕೇಂದ್ರ ಸಚಿವ ಪ್ರಲ್ಹಾದ ಜೋಶಿ, ರಾಜ್ಯಪಾಲ ಥಾವರ್‌ಚಂದ್‌ ಗೆಹಲೋತ್‌, ಸಚಿವ ಬೈರತಿ ಸುರೇಶ್, ಉಡುಪಿ–ಚಿಕ್ಕಮಗಳೂರು ಸಂಸದ ಕೋಟ ಶ್ರೀನಿವಾಸ ಪೂಜಾರಿ, ಶಿವಮೊಗ್ಗ ಸಂಸದ ರಾಘವೇಂದ್ರ, ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷ ಬಿ.ವೈ. ವಿಜಯೇಂದ್ರ ಇತರರು ವೇದಿಕೆಯಲ್ಲಿದ್ದರು. ಉಡುಪಿ-ಬನ್ನಂಜೆಯ ಡಾ.ವಿ.ಎಸ್. ಆಚಾರ್ಯ ಬಸ್ ನಿಲ್ದಾಣದ ಬಳಿ ಶ್ರೀ ನಾರಾಯಣ ಗುರು ಸರ್ಕಲ್​ನಿಂದ ರೋಡ್ ಶೋ ನಡೆಸಿದ ಪ್ರಧಾನಿ ಮೋದಿ ಅವರಿಗೆ ಪುಷ್ಪವೃಷ್ಟಿ ಸ್ವಾಗತ ಕೋರಲಾಯಿತು.