ಜಿಲ್ಲಾ ಪಂಚಾಯತ್ ರಸ್ತೆಯಲ್ಲಿ ದೋಣಿ ಹೊಂಡಕ್ಕಿಳಿಸಿ ಯುವ ಕಾಂಗ್ರೆಸ್ ನಿಂದ ಪ್ರತಿಭಟನೆ

 ಬದಿಯಡ್ಕ :  ಕನ್ಯಪ್ಪಾಡಿ - ಮುಂಡಿತ್ತಡ್ಕ ರಸ್ತೆಯಲ್ಲಿ ಮಳೆ ನೀರಿನಿಂದ ತುಂಬಿ ತುಳುಕುತ್ತಿರುವ ರಸ್ತೆಯನ್ನು ಸಂಚಾರಕ್ಕೆ ಯೋಗ್ಯಗೊಳಿಸುವಂತೆ ಒತ್ತಾಯಿಸಿ ರಸ್ತೆಯಲ್ಲಿ ಸಾಂಕೇತಿಕ ದೋಣಿ ನಿರ್ಮಿಸಿ ಪ್ರತಿಭಟನೆ ನಡೆಸಲಾಯಿತು. ಎಣ್ಮಕಜೆ ಮತ್ತು ಬದಿಯಡ್ಕ ಯುವ ಕಾಂಗ್ರೆಸ್ ಮಂಡಲ ಕಾಂಗ್ರೆಸ್ ಸಮಿತಿಗಳ ವತಿಯಿಂದ ಚೆನ್ನಗುಳಿಯಲ್ಲಿ ಪ್ರತಿಭಟನೆ ನಡೆಯಿತು. ಯುವ ಕಾಂಗ್ರೆಸ್ ಎಣ್ಮಕಜೆ ಮಂಡಲದ ಅಧ್ಯಕ್ಷ ಫಾರೂಕ್ ಪಿ ಎಂ ಅವರ ಅಧ್ಯಕ್ಷತೆಯಲ್ಲಿ ನಡೆದ ಪ್ರತಿಭಟನೆಯನ್ನು ಡಿಸಿಸಿ ಪ್ರಧಾನ ಕಾರ್ಯದರ್ಶಿ ಮತ್ತು ಎಣ್ಮಕಜೆ ಪಂಚಾಯತ್ ಅಧ್ಯಕ್ಷ ಸೋಮಶೇಖರ್ ಜೆ ಎಸ್ ಅವರು ರಸ್ತೆಯ ಹಳ್ಳಕ್ಕೆ ದೋಣಿಯನ್ನು ಕರೆದೊಯ್ಯುವ ಮೂಲಕ ಉದ್ಘಾಟಿಸಿದರು. ಯುವ ಕಾಂಗ್ರೆಸ್ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಶ್ರೀನಾಥ್, ಬದಿಯಡ್ಕ ಪಂಚಾಯತ್ ಉಪಾಧ್ಯಕ್ಷ ಎಂ. ಅಬ್ಬಾಸ್, ಮುಸ್ಲಿಂ ಲೀಗ್ ಮಂಜೇಶ್ವರ ಕ್ಷೇತ್ರ ಜೊತೆ ಕಾರ್ಯದರ್ಶಿ ಸಿದ್ದೀಕ್ ವಳಮುಗರ್, ಎನ್ಮಕಜೆ ಪಂಚಾಯತ್ ಸದಸ್ಯೆ ಸರೀನಾ ಮುಸ್ತಫಾ, ಮುಖಂಡರಾದ ಎಂ ಎಚ್ ಆರೀಸ್ ಶೇಣಿ ,ಕುಂಜಾರ್ ಮುಹಮ್ಮದ್ ಹಾಜಿ, ಕಮರುದ್ದೀನ್ ಪಡಲಡುಕ್ಕ, ರವಿ ಕುಂಡಲ್ ಮೂಲ, ಐತಪ್ಪ ಚೆನ್ನಗುಳಿ ಮೊದಲಾದವರು ನೇತೃತ್ವ ವಹಿಸಿದ್ದರು.

ಕಾಸರಗೋಡು ಜಿಲ್ಲಾ ಪಂಚಾಯತ್ ಗೊಳಪಟ್ಟ ಕಾಸರಗೋಡು-ಮುಂಡಿತ್ತಡ್ಕ ರಸ್ತೆಯಲ್ಲಿ ಕನ್ಯಪ್ಪಾಡಿ, ಮಾಡತ್ತಡ್ಕ, ದೇವರಮೆಟ್ಟು, ಪಳ್ಳಂ ವರೆಗಿನ ರಸ್ತೆ ಕುಸಿದು ಗುಂಡಿ ಉಂಟಾಗಿದ್ದು, ಕೆಲವು ಸ್ಥಳಗಳಲ್ಲಿ ಕಬ್ಬಿಣದ ತಂತಿಯನ್ನು ರಸ್ತೆಯಿಂದ ಮೇಲ್ಭಾಗಕ್ಕೆ ತಳ್ಳಿ ವಾಹನಗಳ ಟೈರ್ ಗಳಿಗೆ ಹಾನಿಯಾಗಿದೆ. ಕೂಡಲೇ ಗುಂಡಿಗಳನ್ನು ಮುಚ್ಚಿ ವಾಹನ ಸಂಚಾರಕ್ಕೆ ಅನುವು ಮಾಡಿಕೊಡಬೇಕು ಎಂದು ಒತ್ತಾಯಿಸಿ ಯುವ ಕಾಂಗ್ರೆಸ್ ಕಾರ್ಯಕರ್ತರು ಪ್ರತಿಭಟನೆ ನಡೆಸಿದರು. ತುರ್ತು ದುರಸ್ತಿ ಕಾರ್ಯ ಕೈಗೊಂಡು ವಾಹನ ಸಂಚಾರಕ್ಕೆ ಅನುವು ಮಾಡಿಕೊಡದಿದ್ದರೆ ರಸ್ತೆ ತಡೆ ಸೇರಿದಂತೆ ಪ್ರತಿಭಟನೆ ನಡೆಸುವುದಾಗಿ ಯುವ ಕಾಂಗ್ರೆಸ್ ಪದಾಧಿಕಾರಿಗಳು ತಿಳಿಸಿದ್ದಾರೆ.