ಎಣ್ಮಕಜೆ ಪಂಚಾಯತ್ ನ ನಡುಬೈಲ್ ಉನ್ನತಿಯಲ್ಲಿ ನೀರಿಗಾಗಿ ಅಲೆದಾಟ

 

ಪೆರ್ಲ : ಬೇಸಿಗೆ ಬೇಗೆ ತೀವ್ರಗೊಳ್ಳುತ್ತಿದ್ದಂತೆ ಕುಡಿ ನೀರ ತತ್ವಾರ  ಕಂಡು ಬರತೊಡಗಿದೆ. ಹಲವೆಡೆಗಳಲ್ಲಿ ಕುಡಿನೀರು ಲಭಿಸದೆ ಕಿಲೋ ಮೀಟರ್ ದೂರದಿಂದ ನೀರು ಹೊತ್ತು ತರಬೇಕಾದ ಪರಿಸ್ಥಿತಿ ಇಲ್ಲಿ ಸರ್ವೇ  ಸಾಮಾನ್ಯವಾಗಿದೆ. ಎಣ್ಮಕಜೆ ಪಂಚಾಯತಿನ  17ನೇ ವಾರ್ಡ್ ಬೇಂಗಪದವು ವ್ಯಾಪ್ತಿಯ ನಡುಬೈಲ್ ಉನ್ನತಿ  ನಿವಾಸಿಗಳು  ಎರಡು ತಿಂಗಳಿಂದ ನೀರು ಪೂರೈಕೆ ಸ್ಥಗಿತಗೊಂಡು ಆತಂಕಕ್ಕೊಳಗಾಗಿದ್ದಾರೆ. ಜಲ ಪ್ರಾಧಿಕಾರದ ಪೈಪ್ ಲೈನ್ ಮೇಲ್ಭಾಗದಲ್ಲಿ ಕೊಳವೆ ಬಾವಿ ಇದ್ದರೂ ಮೋಟಾರ್ ಕೆಟ್ಟಿದ್ದರಿಂದ ನೀರು ತೆಗೆದುಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಕೊಳವೆ ಬಾವಿ, ಮೋಟಾರು ತಪಾಸಣೆಗೆ ತಜ್ಞರನ್ನು ನೇಮಿಸಿದ್ದರೂ  ಅವರ ಪ್ರಮಾಣ ಪತ್ರ ಪಡೆದ ನಂತರವೇ ಹಣ ಮಂಜೂರು ಮಾಡಿ ಮುಂದಿನ ಕ್ರಮ ಕೈಗೊಳ್ಳಬಹುದು ಎಂಬ ಕಾನೂನು ಇರುವುದರಿಂದ ಜನರ ಹಾಹಾಕಾರ ಮುಗಿಲು ಮುಟ್ಟಿದೆ.

ನೀರಿನ ಅಭಾವ ಉಲ್ಬಣಗೊಂಡಿದ್ದರಿಂದ  ಕೂಲಿ ಕೆಲಸಕ್ಕೆ ಹೋಗುವವರು, ವಿದ್ಯಾರ್ಥಿಗಳು ಪರದಾಡಬೇಕಾಗುತ್ತದೆ. ನೀರು ತರಲು ಸಮಯ ಕಂಡುಕೊಳ್ಳಬೇಕಾಗಿರುವುದರಿಂದ ಸಮಯಕ್ಕೆ ಸರಿಯಾಗಿ ಕೆಲಸಕ್ಕೆ, ಶಾಲೆಗೆ ಹೋಗಲು ಸಾಧ್ಯವಾಗುತ್ತಿಲ್ಲ. ಎಣ್ಮಕಜೆ ಪಂ.ನ ನೀರು ಪೂರೈಕೆ ಸ್ಥಗಿತಗೊಂಡಿರುವ ಪರಿಶಿಷ್ಟ ಪಂಗಡದ ನಡುಬೈಲು ಉನ್ನತಿ ನಿವಾಸಿಗಳು ಅನ್ಯ ಸ್ಥಳದಿಂದ ಸಂಗ್ರಹಿಸಿದ ನೀರಿನಿಂದ ಉನ್ನತಿಗೆ ತೆರಳುತ್ತಾರೆ.

ವಾರ್ಡ್ ನ ವಿವಿಧೆಡೆ ತೀವ್ರ ನೀರಿನ ಬವಣೆ ನೀಗಿಸಲು  ಅಧಿಕಾರಿಗಳು ಪರಿಶೀಲನೆ ನಡೆಸಿ ಎರಡು ದಿನ ನೀರು ಪೂರೈಸುತ್ತಾರೆ. ಈಗ ಜಲ ಜೀವನ್ ಮಿಷನ್ ಪೈಪ್ ಲೈನ್ ಕೂಡ ಹಾಕುತ್ತಿದೆ. ಇದರಲ್ಲಿ ಒಂದರಲ್ಲೂ ನೀರಿಲ್ಲ.  ಇದನ್ನು ಬಗೆಹರಿಸಿ ನೀರು ಪೂರೈಕೆಗೆ ಕ್ರಮಕೈಗೊಳ್ಳುವಂತೆ ಮುಖ್ಯಮಂತ್ರಿಗಳಿಗೆ ದೂರು ನೀಡಲಾಗಿದೆ. ಶಾಶ್ವತವಾಗಿ ಸಮಸ್ಯೆ ಬಗೆಹರಿಸಲು ಜಲಮಂಡಳಿ ವತಿಯಿಂದ ಕ್ರಮಕೈಗೊಳ್ಳಬೇಕಿದೆ ಎಂದು ವಾರ್ಡ್ ಸದಸ್ಯೆ ಸೌದಾಬಿ ಹನೀಫ್ ಆಗ್ರಹಿಸಿದರು.