ಹುತಾತ್ಮರ ಬಲಿದಾನ ಹಚ್ಚಲಿ ದೇಶಪ್ರೇಮದ ಕಿಚ್ಚು

 

ಭಾರತದ ಸ್ವಾತಂತ್ರ್ಯ ಸಂಗ್ರಾಮವು ಕೇವಲ ಅಹಿಂಸೆಯಿಂದ ಮಾತ್ರವಲ್ಲದೆ, ಕ್ರಾಂತಿಕಾರಿಗಳ ಕೆಚ್ಚೆದೆಯ ರಕ್ತದಿಂದಲೂ ಬರೆಯಲ್ಪಟ್ಟಿದೆ. "ಸತ್ತ ಮೇಲೆಯೂ ನನ್ನ ಮಣ್ಣಿನಿಂದ ದೇಶಭಕ್ತಿಯ ಸುಗಂಧ ಬರಲಿದೆ" ಎಂಬ ಭಗತ್ ಸಿಂಗ್ ಅವರ ಮಾತುಗಳು ಭಾರತದ ಸ್ವಾತಂತ್ರ್ಯ ಸಂಗ್ರಾಮದ ತೀವ್ರತೆಯನ್ನು ಸಾರುತ್ತವೆ.   ಪ್ರತಿ ವರ್ಷ ಮಾರ್ಚ್ 23 ರಂದು ಭಾರತವು 'ಹುತಾತ್ಮರ ದಿನ'ವನ್ನು ಆಚರಿಸುತ್ತದೆ. ತಾಯಿ ಭಾರತಿಯ ಮುಕ್ತಿಯ ಹಾದಿಯಲ್ಲಿ ತಮ್ಮ ಪ್ರಾಣವನ್ನೇ ಹೂವಿನಂತೆ ಅರ್ಪಿಸಿದ ಮಹಾನ್ ಚೇತನಗಳ ನೆನಪೇ ಈ ಹುತಾತ್ಮರ ದಿನ. ಇದು  ಬ್ರಿಟಿಷ್ ಸಾಮ್ರಾಜ್ಯಶಾಹಿಯ ವಿರುದ್ಧ ಎದೆಗೊಟ್ಟು ನಿಂತು, 1931 ರ ಮಾರ್ಚ್ 23 ರಂದು ದೇಶಕ್ಕಾಗಿ ನಗುನಗುತ್ತಾ ಗಲ್ಲಿಗೇರಿದ  ಮೂವರು ಅಪ್ರತಿಮ ವೀರರಾದ ಭಗತ್ ಸಿಂಗ್, ಸುಖ್‌ದೇವ್ ಮತ್ತು ರಾಜಗುರು ಅವರಿಗೆ ಸಲ್ಲಿಸುವ ಗೌರವಪೂರ್ವಕ ನಮನವಾಗಿದೆ. ಈ ಮೂವರು ವೀರರ ಅಪ್ರತಿಮ ಬಲಿದಾನ ಮತ್ತು ದೇಶಪ್ರೇಮವನ್ನು ಸ್ಮರಿಸಲು ಪ್ರತಿ ವರ್ಷ ಮಾರ್ಚ್ 23 ರಂದು ಭಾರತದಾದ್ಯಂತ 'ಹುತಾತ್ಮರ ದಿನ'ವನ್ನು ಅತ್ಯಂತ ಭಕ್ತಿ-ಗೌರವಗಳಿಂದ ಆಚರಿಸಲಾಗುತ್ತದೆ.

1920ರ ದಶಕದಲ್ಲಿ ಭಾರತದ ಸ್ವಾತಂತ್ರ್ಯ ಹೋರಾಟವು ಎರಡು ಮಾರ್ಗಗಳಲ್ಲಿ ಸಾಗುತ್ತಿತ್ತು. ಒಂದು ಅಹಿಂಸಾ ಮಾರ್ಗವಾದರೆ, ಮತ್ತೊಂದು ಕ್ರಾಂತಿಕಾರಿ ಮಾರ್ಗ. ಲಾಲಾ ಲಜಪತ್ ರಾಯ್ ಅವರ ಸಾವಿಗೆ ಪ್ರತೀಕಾರ ತೀರಿಸಲು ಭಗತ್ ಸಿಂಗ್ ಮತ್ತು ಅವರ ತಂಡವು ಬ್ರಿಟಿಷ್ ಪೊಲೀಸ್ ಅಧಿಕಾರಿ ಸೌಂಡರ್ಸ್‌ನನ್ನು ಹತ್ಯೆ ಮಾಡಿತು. ನಂತರ, ಬ್ರಿಟಿಷರ ದಬ್ಬಾಳಿಕೆಯ ಕಾನೂನುಗಳನ್ನು ಪ್ರತಿಭಟಿಸಲು ದೆಹಲಿಯ ಕೇಂದ್ರ ಶಾಸನ ಸಭೆಯಲ್ಲಿ (Central Assembly) ಬಾಂಬ್ ಎಸೆದು, ತಪ್ಪಿಸಿಕೊಳ್ಳದೆ ಸ್ವತಃ ಬಂಧನಕ್ಕೊಳಗಾದರು. ಈ ಘಟನೆಯನ್ನೇ 'ಲಾಹೋರ್ ಸಂಚು' ಎಂದು ಕರೆದ ಬ್ರಿಟಿಷ್ ಸರ್ಕಾರ, ಈ ಮೂವರು ವೀರರಿಗೆ ಮರಣದಂಡನೆ ವಿಧಿಸಿತು.

 1931 ರ ಮಾರ್ಚ್ 24 ರಂದು ಇವರನ್ನು ಗಲ್ಲಿಗೇರಿಸಲು ನಿರ್ಧರಿಸಲಾಗಿತ್ತು. ಆದರೆ, ಇವರ ಜನಪ್ರಿಯತೆ ಮತ್ತು ಜನಸಾಮಾನ್ಯರ ಆಕ್ರೋಶಕ್ಕೆ ಹೆದರಿದ ಬ್ರಿಟಿಷ್ ಸರ್ಕಾರವು ನಿಯಮಗಳನ್ನು ಮೀರಿ, ಒಂದು ದಿನ ಮುಂಚಿತವಾಗಿಯೇ ಅಂದರೆ ಮಾರ್ಚ್ 23, 1931 ರ ಸಂಜೆ ರಹಸ್ಯವಾಗಿ ಇವರನ್ನು ಗಲ್ಲಿಗೇರಿಸಿತು. ಸಾವಿನ ದವಡೆಯಲ್ಲಿದ್ದರೂ ಈ ಮೂವರು ವೀರರು ಹೆದರದೆ 'ಇಂಕ್ವಿಲಾಬ್  ಜಿಂದಾಬಾದ್' (ಕ್ರಾಂತಿ ಚಿರಾಯುವಾಗಲಿ) ಎಂದು ಘೋಷಣೆ ಕೂಗುತ್ತಾ ಮೃತ್ಯುವನ್ನು ಆಲಂಗಿಸಿದರು. ಅಂದು ಭಗತ್ ಸಿಂಗ್ ಅವರಿಗೆ ಕೇವಲ 23 ವರ್ಷ ವಯಸ್ಸಾಗಿತ್ತು.

ಭಗತ್ ಸಿಂಗ್ ಮತ್ತು ಅವರ ತಂಡವು ಭಾರತದ ಯುವಜನತೆಯಲ್ಲಿ ಸ್ವಾತಂತ್ರ್ಯದ ಕಿಚ್ಚನ್ನು ಹಚ್ಚಿತು. "ಇಂಕ್ವಿಲಾಬ್ ಜಿಂದಾಬಾದ್" ಎಂಬ ಘೋಷಣೆ ಇಂದಿಗೂ ದೇಶಪ್ರೇಮದ ಸಂಕೇತವಾಗಿದೆ. ಕೇವಲ ಬ್ರಿಟಿಷರನ್ನು ಓಡಿಸುವುದು ಮಾತ್ರವಲ್ಲದೆ, ಶೋಷಣೆಯಿಲ್ಲದ ಸಮಾಜವನ್ನು ನಿರ್ಮಿಸುವುದು ಇವರ ಗುರಿಯಾಗಿತ್ತು.

ಈ ದಿನದಂದು ದೇಶದಾದ್ಯಂತ ಶಾಲೆ, ಕಾಲೇಜು ಮತ್ತು ಸಂಘ-ಸಂಸ್ಥೆಗಳಲ್ಲಿ ಈ ಮೂವರು ವೀರರ ಭಾವಚಿತ್ರಕ್ಕೆ ನಮನ ಸಲ್ಲಿಸಲಾಗುತ್ತದೆ. ಪಂಜಾಬ್‌ನ ಫಿರೋಜ್‌ಪುರದಲ್ಲಿರುವ ಹುಸೇನಿವಾಲಾ (ಇಲ್ಲಿ ಇವರ ಅಂತ್ಯಕ್ರಿಯೆ ನಡೆದಿತ್ತು) ಎಂಬಲ್ಲಿ ಪ್ರತಿ ವರ್ಷ ಬೃಹತ್ ಶ್ರದ್ಧಾಂಜಲಿ ಸಭೆ ನಡೆಯುತ್ತದೆ. 

ಮಾರ್ಚ್ 23 ಕೇವಲ ಒಂದು ದಿನಾಂಕವಲ್ಲ, ಅದು ಭಾರತೀಯ ಯುವಶಕ್ತಿಯ ಸಂಕೇತ. ಈ ದಿನವು ಇಂದಿನ ಯುವಜನತೆಗೆ ದೇಶಕ್ಕಾಗಿ ಏನನ್ನಾದರೂ ಸಾಧಿಸುವ ಹಂಬಲವನ್ನು ಮೂಡಿಸುತ್ತದೆ. ದೇಶಪ್ರೇಮದ ಕಿಚ್ಚನ್ನು ಹಚ್ಚುತ್ತದೆ.  ಸಾವು ಎದುರಿಗಿದ್ದರೂ ಸತ್ಯ ಮತ್ತು ನ್ಯಾಯಕ್ಕಾಗಿ ಹೋರಾಡುವ ಧೈರ್ಯವನ್ನು ಈ ಕ್ರಾಂತಿಕಾರಿಗಳ ಜೀವನ ನಮಗೆ ಕಲಿಸುತ್ತದೆ. ದೇಶದಾದ್ಯಂತ ಶಾಲೆ, ಕಾಲೇಜುಗಳಲ್ಲಿ ಇವರ ಬಲಿದಾನದ ಕಥೆಗಳನ್ನು ಸ್ಮರಿಸುವ ಮೂಲಕ ರಾಷ್ಟ್ರೀಯ ಭಾವೈಕ್ಯತೆಯನ್ನು ಬೆಳೆಸಲಾಗುತ್ತದೆ.

ದೇಶದ ಸ್ವತಂತ್ರ ಗಾಳಿಯಲ್ಲಿ ನಾವು ಇಂದು ಉಸಿರಾಡುತ್ತಿದ್ದೇವೆ ಎಂದರೆ, ಅದಕ್ಕೆ ಅಂದು ಈ ಯುವ ಕ್ರಾಂತಿಕಾರಿಗಳು ಹರಿಸಿದ ರಕ್ತವೇ ಕಾರಣ. ಭಗತ್ ಸಿಂಗ್, ಸುಖ್‌ದೇವ್ ಮತ್ತು ರಾಜಗುರು ಅವರು ಹಾಕಿಕೊಟ್ಟ ದೇಶಪ್ರೇಮದ ಹಾದಿಯಲ್ಲಿ ನಡೆಯುವುದು ನಮ್ಮೆಲ್ಲರ ಜವಾಬ್ದಾರಿಯಾಗಿದೆ. ಕೇವಲ ವರ್ಷಕ್ಕೊಮ್ಮೆ ಅವರನ್ನು ಸ್ಮರಿಸುವುದು ಮಾತ್ರವಲ್ಲದೆ, ಅವರ ಉದಾತ್ತ ವಿಚಾರಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳುವುದೇ ನಾವು ಅವರಿಗೆ ಸಲ್ಲಿಸುವ ನಿಜವಾದ ಶ್ರದ್ಧಾಂಜಲಿ. 

ದೇಶದ ಇಂದಿನ ಸ್ವತಂತ್ರ ಮತ್ತು ಸುಭದ್ರ ಸ್ಥಿತಿಗೆ ಅಂದು ಮಡಿದ ಸಾವಿರಾರು ಹುತಾತ್ಮರ ತ್ಯಾಗವೇ ಅಡಿಪಾಯವಾಗಿದೆ. ಅವರು  ಕಂಡ ಕನಸಿನ ಭಾರತವನ್ನು ನಿರ್ಮಿಸುವುದು ಪ್ರತಿಯೊಬ್ಬ ಭಾರತೀಯನ ಆದ್ಯ ಕರ್ತವ್ಯವಾಗಿದೆ.  "ವ್ಯಕ್ತಿಗಳನ್ನು ಕೊಲ್ಲಬಹುದು, ಆದರೆ ಅವರ ವಿಚಾರಗಳನ್ನಲ್ಲ" ಎಂಬ ಭಗತ್ ಸಿಂಗ್ ಅವರ ಮಾತುಗಳಂತೆ, ಅವರ ಕ್ರಾಂತಿಕಾರಿ ವಿಚಾರಗಳು ಇಂದಿನ ಯುವ ಪೀಳಿಗೆಗೆ ಸದಾ ದಾರಿದೀಪವಾಗಲಿ. ಆ ವೀರ ಹುತಾತ್ಮರಿಗೆ ನಮ್ಮ ಕೋಟಿ ಕೋಟಿ ನಮನಗಳು. 

ಸಂಗ್ರಹ ಲೇಖನ :  ವನಜಾಕ್ಷಿ ಪಿ ಚೆಂಬ್ರಕಾನ